Ադրբեջանը պատրաստվում է նոր էսկալացիայի
ՎԵՐԼՈՒԾՈՒԹՅՈՒՆՆԵՐ
Վերջին շրջանում Ադրբեջանը պարբերաբար ապատեղեկատվությունների շարք է սկսել. Հայաստանի զինված ուժերին մեղադրում է հրադադարի ռեժիմը անընդհատ խախտելու մեջ։
Հայաստանի Պաշտպանության նախարարությունը ստիպված է լինում հերքումներով պատասխանել ադրբեջանական ապատեղեկատվությանը, իսկ նախօրեին էլ Ադրբեջանի Պաշտպանության նախարարությունում խորհրդակցություն է կայացել, որին մասնակցել են պաշտպանության նախարար Զաքիր Հասանովը, բոլոր զինատեսակների՝ ինչպես 44-օրյա պատերազմի ընթացքում գրավված շրջաններում տեղակայված զորամասերի հրամանատարները։
Պաշտպանության նախարարը հայտարարել է, թե Ադրբեջանի բանակին հրամայվել է մշտապես պատրաստ լինել Ղարաբաղում և հայ-ադրբեջանական սահմանին հայկական զինված ուժերի հնարավոր սադրանքների անհապաղ և վճռական կանխմանը։
Ադրբեջանի ՊՆ տարածած հաղորդագրության համաձայն՝ խորհրդակցության ընթացքում մասնակիցները մանրամասն վերլուծել են հայ-ադրբեջանական պետական սահմանի և Ղարաբաղում տիրող օպերատիվ իրավիճակի կացությունը։
Ըստ էության, Բրյուսելում Հայաստանի և Ադրբեջանի ղեկավարների հանդիպման ձախողումից և որևէ պայմանավորվածության չհանգելուց հետո, Ադրբեջանը ակնհայտորեն պետք է պատրաստվեր նոր էսկալացիայի, իսկ Ուկրաինայում վերջին օրերին Ռուսաստանի ակնհայտ պարտությունները լուրջ հիմք են ստեղծել թշնամի պետության ղեկավարության համար՝ մտածելու Հայաստանին նոր զիջումներ պարտադրելու հարցի շուրջ։
Միջազգային հանրության կարծիքը զոնդաժ անելուց հետո, Ադրբեջանը օգտվելու է աշխարհաքաղաքական իրավիճակից և նոր պատերազմ սանձազերծի հայկական զինված ուժերի դեմ։
Հայաստանի իշխանությունները այս պարագայում գրեթե ոչինչ անելու ընդունակ չեն, ընդամենը Նիկոլ Փաշինյանը կարողանում է ընդունել Հայաստանում գտնվող ԵԱՀԿ Մինսկի խմբի համանախագահին և մտքեր փոխանակել հարաբերությունների կարգավորման տարածաշրջանային կայունությանն ու անվտանգությանն առնչվող այլ թեմաների շուրջ։
Ռոբերտ Մարգարյան
