Մի հարցում հայ-ամերիկյան շահերը համընկնում են
ՎԵՐԼՈՒԾՈՒԹՅՈՒՆՆԵՐ
Միացյալ Նահանգների երկրորդ խիստ գնահատականից հետո, Երևանը վերջապես հակադարձել է Բաքվի պնդումներին, թե Ղարաբաղյան պատերազմից հետո Մինսկի խումբն այլս գոյություն չունի։
«ԵԱՀԿ Մինսկի խմբի համանախագահությունն ունի միջազգային մանդատ՝ աջակցելու Լեռնային Ղարաբաղի հակամարտության տևական ու համապարփակ կարգավորմանը և այս մանդատը որևէ մեկը չի չեղարկել՝ արձագանքելով Բաքվի հնչած կոշտ արձագանքին»,- հայտարարել է Հայաստանի արտգործնախարարության մամուլի խոսնակ Վահան Հունանյանը։
Հիշեցնենք, պետքարտուղար Բլինքենը նախօրեին ԵԱՀԿ Մինսկի խմբում ամերիկյան համանախագահ է նշանակել դեսպան Ֆիլիպ Ռիքերին, որից հետո Ադրբեջանի արտգործնախարարությունից հայտարարել էին, թե գրեթե չգործող Մինսկի խումբը վերակենդանացնելու փորձերով, Ամերիկան կարող է դուրս մնալ հայ-ադրբեջանական հարաբերությունների կարգավորման գործընթացից։
Վաշինգտոնից վերահաստատել են՝ դեսպան Ռիքերի նշանակմամբ, հանձնառու են նպաստելու Հայաստանի և Ադրբեջանի միջև ուղիղ երկխոսությանը, երկկողմ, բազմակողմ ձևաչափերով հասնելու 2 երկրների միջև համապարփակ խաղաղ կարգավորմանը։
Պետքարտուղարության գլոբալ հանրային կապերի բյուրոյի փոխխոսնակ Վեդանտ Պատելը բավականին կոշտ արձանագրումներ է արել՝ տեղը դնելով Ադրբեջանին։ Միայն այդ հանգամանքից հետո պաշտոնական Երևանը համարձակվել է առաջ տանել իր քաղաքական գիծը։
44-օրյա պատերազմից հետո ԵԱՀԿ Մինսկի խմբի մասին հայտարարում են միայն Հայաստանը, Միացյալ Նահանգներն ու Եվրամիությունը, Ադրբեջանն ու Ռուսաստանը բառացի հայտարարում են, թե ԵԱՀԿ Մինսկի խումբը այլևս գոյություն չունի և չի կարող ազդել կարգավորման գործընթացի վրա։ Որքան էլ այս հարցում Հայաստանի և Ռուսաստանի շահերն ու պաշտոնական դիրքորոշումներն իրար հետ չհամընկնեն, փաստն այն է, որ Հայաստանի Հանրապետությունը ստիպված է առաջ մղել ԵԱՀԿ Մինսկի խմբին կարգավորման գործընթացում ներգրավվելու իր պահանջը։
Նման պարագայում բազմաթիվ քաղաքագետներ նշում են, որ Հայաստանը ունի մեկ այլ կարևոր կռվան, կարող է ԵԱՀԿ Մինսկի բոլոր համանախագահներին՝ այդ թվում նաև Ռուսաստանի ներկայացուցչին, հրավիրել Հայաստան՝ քննարկելու նրանց հետ կարգավորման գործընթացը։ Չգիտենք, թե որքանով Հայաստանի գործող իշխանությունները ականջալուր կլինեն այս պնդմանը, սակայն ակնկալում ենք, որ ի վերջո փաշինյանական վարչախումբը կհասկանա, թե ո՞րն է Հայաստանի իրական շահը և կփորձի աշխատել այդ ուղղությամբ։
Արմեն Վարդանյան
