Ռուսաստանը աննախադեպ ակտիվանում է արցախյան հարցով
ՎԵՐԼՈՒԾՈՒԹՅՈՒՆՆԵՐ
Ռուսաստանը աննախադեպ ակտիվանում է արցախյան հարցով և առայժմ չի կարելի ասել դրակա՞ն է դա Հայաստանի և Արցախի համար, թե՞ ոչ։
Մինչ Հայաստանի գործող իշխանությունները տեղեկություն չեն հայտնում օգոստոսի վերջին Փաշինյան-Ալիև-Պուտին հնարավոր հանդիպման վերաբերյալ, փոխվարչապետ Մհեր Գրիգորյանի գրասենյակից հայտնել են, թե Հայաստանի և Ադրբեջանի միջև սահմանազատման և սահմանային անվտանգության հարցերի հանձնաժողովների հանդիպումը նախատեսված է մինչև օգոստոսի վերջ և Մոսկվայում։
Ընդ որում փոխվարչապետի գրասենյակից նշել են, թե ձևավորված հարցերի առանձին օրակարգ այս պահին որոշված չէ։ Ի դեպ երեկ Արցախում կայացել է խորհրդարանական 5 ուժերի ղեկավարների հանդիպումը Ռուսաստանի խաղաղապահ զորակազմի ղեկավարության հետ։ Արցախի խորհրդարանականներն իրենք էին դիմել խաղաղապահ ուժերի ղեկավարությանը հանդիպելու նպատակով։ Շարժառիթը Հայաստանում Ռուսաստանի դեսպան ու խորհրդական Մաքսիմ Սելեզնյովի վերջերս արած հայտարարությունն էր, ինչպես նաև օգոստոսի սկզբին Ադրբեջանի կողմից հրադադարի հերթական խախտումը։
Ըստ Արցախի Ազգային ժողովի տարածած հաղորդագրության` նշվել է, որ նոր երթուղին ունենալու է նույն միջանցքի կարգավիճակը, և պահպանվելու են բոլոր անվտանգային բաղադրիչները՝ սկսած 5 կմ-ոց անվտանգության գոտուց մինչև Ռուսաստանի Դաշնության խաղաղապահ ուժերի անցակետերի տեղակայմամբ։
Ռուսական խաղաղապահ զորակազմի անձնակազմը նաև նշել է, թե անհրաժեշտ եզրահանգումներ է արել օգոստոսյան դեպքերի հետ կապված և վստահեցրել, որ լրացուցիչ ջանքեր կգործադրեն ապագայում նմանօրինակ խախտումները կանխելու և բնակչության պատշաճ անվտանգությունը ապահովելու համար։
Այս ամենին զուգահեռ, երեկ՝ Հայաստանի Անկախության հռչակագրի օրը, տարօրինակ մի միջոցառում է տեղի ունեցել Ստեփանակերտում։ Մասշտաբային ռուսամետ ակցիա, որի մասնակիցները Ստեփանակերտի կենտրոնական փողոցներով տարել են Ռուսաստանի հսկայական 100 մետրանոց դրոշը։ Հարյուրավոր բնակիչներ դրոշը Ստեփանակերտից հասցրել են մինչև հայտնի արձանի մոտ, որտեղ հայտարարել են, թե Լեռնային Ղարաբաղը միշտ ամուր կապեր է ունեցել ռուս ժողովրդի հետ և բազմաթիվ զորավարներ և գեներալներ է տվել ինչպես Ցարական Ռուսաստանին, այնպես էլ ԽՍՀՄ-ին։
Ըստ էության, այս ամենը ռուսական կողմի նախազգուշացումն է Հայաստանի գործող իշխանություններին, որ իրենք ավելի շատ են զբաղվելու Լեռնային Ղարաբաղի կարգավորման հարցերով և իրականում Արցախի տարածքը համարում են ոչ թե հայկական, կամ ադրբեջանական, այլ հենց ռուսական։ Ինչ-որ առումով կարելի էր սա նաև դրական գնահատել Արցախի բնակչության անվտանգության պահպանման առումով։
Ռուբեն Լևոնյան
