Փաշինյանը կրկին լվանում է ձեռքերը․ ոչ թե շնորհավորանք, այլ՝ մուննաթ
ՎԵՐԼՈՒԾՈՒԹՅՈՒՆՆԵՐ
Հայաստանի Անկախության հռչակագրի օրը վարչապետի պաշտոնը զբաղեցնող Նիկոլ Փաշինյանի շնորհավորական ուղերձը ոչ այնքան շնորհավորական ուղերձ էր, որքան նոր մտահոգությունների առիթ։
Ըստ էության, երկարաշունչ ուղերձում երկու դրվագ կար, որոնք լրջագույն խնդիրների առկայության մասին են խոսում։ Փաշինյանը հայտարարել է, թե Հայաստանի կառավարությունն ամեն օր պայքարում է Հայաստանի Հանրապետության անկախության համար։
«Անկախությունը մեզ համար անվտանգություն է, որն ապահովող միջազգային կառուցակարգերը բոլորիս աչքի առաջ ճաք են տալիս և առաջիններից այդ ճաքը ցավոք արտահայտվել է Լեռնային Ղարաբաղում»,- նշել է Փաշինյանը։
Նրա խոսքով անկախությունը կարգավորված հարաբերություններ են հարևանների հետ. մենք թեև մեր հարևանների մի մասի հետ ունենք փայլուն հարաբերություններ, մյուս մասի հետ հարաբերություններում որևէ էական առաջընթաց չի արձանագրվում, որովհետև նրանք չափազանց մեծ գին են պահանջում մեզնից, կամ էլ համարում են, որ մենք ենք իրենցից չափազանց մեծ գին պահանջում։
Փաստացի այս հայտարարությամբ Նիկոլ Փաշինյանը կարող էր անդրադառնալ թե՛ Թուրքիային, թե՛ Ադրբեջանին, նշել, որ այդ երկու երկրների հետ էլ հարաբերություններում որևէ էական առաջընթաց չի արձանագրվում։ Որքան էլ Հայաստանի իշխանությունները հայտարարում են, թե Թուրքիան նախապայմաններ առաջ չի քաշում, ըստ էության, Փաշինյանն ինքն է այս հայտարարությամբ հաստատում, որ նրանք չափազանց մեծ գին են պահանջում մեզնից։
Նույն ուղերձում նաև Փաշինյանը նշել է, թե անկախությունը մեզ համար ամուր դաշնակցային հարաբերություններ են, բայց դաշնակիցները միշտ չէ, որ միայն քեզ են դաշնակից, այլև նրանց, ովքեր դաշնակցում են քո դեմ։
Այս պարբերությամբ էլ Փաշինյանը, ըստ էության, հակառուսական հերթական հայտարարությունն է անում՝ Ռուսաստանին մեղադրելով իր դաշնակցային հարաբերությունները բավարար չափով չկատարելու մեջ։ Ամեն դեպքում Փաշինյանի ուղերձից կարելի է եզրակացնել, որ Հայաստանին նորանոր վտանգներ են սպասվում թե՛ Ռուսաստանից և թե՛ թուրք-ադրբեջանական տանդեմից։
Միաժամանակ Փաշինյանը իր ուղերձով փորձում է պատասխանատվությունը ուղղակիորեն բարդել Ռուսաստանի և թշնամի երկրների վրա և Հայաստանին հնարավոր պատուհասող նորանոր խնդիրներից սեփական ձեռքերը լվանալ, որպեսզի հետո հայտարարի, թե իր վարչախումբը որևէ մեղք չունի։ Մինչդեռ հենց Նիկոլ Փաշինյանն է մեղավոր, որ որոշ հարևանների հետ հարաբերություններում հնարավոր չէ առաջընթաց գրանցել, իսկ դաշնակիցն էլ առանձնապես շահագրգռված չէ Հայաստանի Հանրապետության հետ լավ դաշնակցային հարաբերություններ ունենալ։
Սամվել Թորոսյան
