Չավուշօղլուն կրկին նախապայմաններ է առաջ քաշում
ՎԵՐԼՈՒԾՈՒԹՅՈՒՆՆԵՐ
Թուրքիայի արտգործնախարար Մևլյութ Չավուշօղլուն երեկ հերթական հայտարարություններն է արել Հայաստանի հասցեին՝ լուրջ մեղադրանքներ հասցեագրելով։ Թուրքական հեռուստաընկերությանը տված հարցազրույցում Չավուշօղլուն հայտարարել է, թե Երևանը պետք է իմանա, որ Անկարան Բաքվից թաքնված ծրագրեր չունի։
Չավուշօղլուն նշել է, թե իրատեսական չէ հայ-թուրքական կարգավորման գործընթացը հայ-ադրբեջանական բանակցություններից անկախ դիտարկել։ Չնայած թե՛ Երևանը, թե՛ Անկարան հայտարարում են, որ հարաբերությունները պետք է կարգավորվեն առանց նախապայմանների, Չավուշօղլուն փաստացի հերթական անգամ իրենց սեփական նախապայմաններն է առաջ քաշում՝ Հայաստանի գործող իշխանություններին դնելով փակուղու, կամ էլ կրկին նվաստացուցիչ պայմաններն ընդունելու վտանգի առջև։
Ըստ Չավուշօղլուի՝ Հարավային Կովկասում կայուն խաղաղությունը կարող է իրականություն դառնալ Հայաստանի և Ադրբեջանի միջև համապարփակ խաղաղություն կնքելով, ինչն իրենք էլ են առաջադրում։ Ադրբեջանը առաջարկ էր արել Հայաստանին, որին Հայաստանը երկար ժամանակ դրական չէր պատասխանում։ Բրյուսելյան վերջին հանդիպման ժամանակ երկու երկրների արտաքին գերատեսչությունների ղեկավարներին հանձնարարեցին աշխատել այս ուղղությամբ։
«Սահմանազատման համատեղ հանձնաժողով է ստեղծվել, որպեսզի զբաղվի սահմանների ճշգրտմամբ»,- ասել է Չավուշօղլուն։ Նա նաև խոսել է Բաքվի մյուս պահանջի ՝ Ղարաբաղից Հայաստանյան ուժերը դուրս բերելու մասին.
«Գիտեք, մեկ էլ կա Զանգեզուրի միջանցքը, սա ասելիս Հայաստանն անհանգստանում է: Եղբա՛յր, սրանք ձեր ստորագրած պայմանագրերում կան՝ եռակողմ պայմանագրի մեջ, որի մաս է նաև Ռուսաստանը: Դու այն ասա՝ իրականում տարածաշրջանում խաղաղություն ուզո՞ւմ ես, թե՞ ոչ»:,- բառացի նշել է Չավուշօղլուն։
Ըստ էության, սա ևս մեկ սպառնալիք է Հայաստանի հասցեին, որ Զանգեզուրի միջանցքը չտալու և Ղարաբաղից զինված հայկական ստորաբաժանումները դուրս չբերելու դեպքում, թուրք-ադրբեջանական տանդեմը կարող է ուժային նոր լուծման գնալ Արցախում կամ Հայաստանում, ինչը ծանրագույն հետևանքներ կարող է առաջադրել Հայաստանի համար։
Չավուշօղլուն մի քանի անգամ կրկնել է, թե Թուրքիան և Ադրբեջանը խաղաղություն են ուզում, միաժամանակ պնդել, թե դրա համար Հայաստանը պետք է քայլեր ձեռնարկի, ոչ թե փորձի արդարանալ, թե ճնշման տակ է Սփյուռքի և ներքին ծայրահեղական ուժերի կողմից։
Թուրքիայի արտգործնախարարի այս հայտարարությունները ևս մեկ անգամ վկայում են, որ փաշինյանական վարչախումբն իրականում դարձել է թուրք-ադրբեջանական տանդեմի սրտի կառավարությունը և ամեն ինչ անում է Հայաստանի Հանրապետությունն ու Արցախը նոր վտանգների առջև կանգնեցնելու համար։
Սարգիս Գասպարյան
