Ընդդիմության ակտիվացման հրամայականը
ՎԵՐԼՈՒԾՈՒԹՅՈՒՆՆԵՐ
Ընդդիմության մի հատվածը այսօր երեկոյան բողոքի հերթական ակցիան է անցկացնում։ Սահմանադրական դատարանի աշխատակազմի նախկին ղեկավար Էդգար Ղազարյանն է նախաձեռնել օգոստոսի 23-ին Հայաստանի Անկախության հռչակագիրն ընդունելու օրը և հայտարարել է, որ իր ընդդիմադիր պայքարի շրջանակներում հեռացնելու է Նիկոլ Փաշինյանին։
Ի սկզբանե մտավախություն կար, որ այս նախաձեռնությունը կարող է ընդդիմության պառակտման պատճառ դառնալ, հատկապես, որ «Դիմադրության» շարժումը սեպտեմբերի 2-ին է հայտարարել իր հանրահավաքի մասին։
Իշխան Սաղաթելյանն էլ երեկ հարցազրույց է տվել, սակայն հերքել է ընդդիմության պառակտվածության մասին բոլոր խոսակցությունները, ավելին նա նշել է, որ ինքն անձամբ մասնակցելու է Էդգար Ղազարյանի հրավիրած հանրահավաքին և իր աջակիցներին ու քաղաքացիներին կոչ է անում, որ ներկա լինեն այս հանրահավաքին։
«Դիմադրության» շարժման գարնանային ակցիաների տապալումից հետո դժվար է լինելու իմի բերել ուժերը և աշնանը նոր թափով լծվելու պայքարին, հատկապես, որ իշխանությունը բավականին հաջողել է ընդդիմության պառակտման հարցում։
Ինչևէ, սակայն, հարկ է նշել, որ ընդդիմությունն այլ տարբերակ պարզապես չունի և պարտադրված է պայքարելու գործող իշխանությունների դեմ, այլապես կկանգնի հերթական կոտրած տաշտակի առջև։ Նիկոլ Փաշինյանն էլ ինքը մյուս կողմից պսևդո ընդդիմադիրների միավորում է նախաձեռնում, որպեսզի նրանց միջոցով կարողանա ազդել քաղաքական գործընթացների վրա և փչացնի իրական և արմատական ընդդիմության պայքարը։ Ամեն դեպքում հուսով ենք, որ այսօր կհաջողվի բավական զգալի ներկայություն ապահովել, Էդգար Ղազարյանն ինքը հայտարարել է, թե պայքարը մեկնարկելու է օգոստոսի 23-ին Հայաստանի Անկախության հռչակագրի ընդունման օրը և ավարտվելու է սեպտեմբերի 21-ին Անկախության հռչակման օրը։
«Ամենաուշը սեպտեմբերի 21-ին Նիկոլ Փաշինյանը պետք է ՀՀ վարչապետ չլինի», - ասել էր Ղազարյանը։
Հայաստանում երբեք էլ նոստրադամուսների և խոստում տվողների պակաս չի եղել, սակայն հուսով ենք, որ ի վերջո կհաջողվի ընդդիմությանը համախմբվել և զգալի, լուրջ հարված հասցնել փաշինյանական վարչախմբին։
Զավեն Նիկողոսյան
