Նոր վտանգ Հայաստանի գլխին
ՎԵՐԼՈՒԾՈՒԹՅՈՒՆՆԵՐ
Ազգային անվտանգության ծառայությունը հերքում է ԶԼՄ-ներով և սոցցանցերով շրջանառվող լուրերը, թե Հայաստանի տարածքով Ադրբեջանից Նախիջևան և հակառակ ուղղությամբ հնարավոր տարանցման ժամանակ «ՀՀ տեղական և միջազգային նշանակություն ունեցող ճանապարհները փակվելու են, ինչով խոչընդոտվելու է Հայաստանի բնակիչների ազատ տեղաշարժը»:
Ազգային անվտանգության ծառայության կողմից շրջանառության մեջ դրված կառավարության որոշման նախագծով, ըստ հաղորդագրության, նախատեսվում է 3 նոր անցակետերի բացում, որոնցով հնարավորություն կընձեռնվի Ադրբեջանից ավտոմոբիլային տրանսպորտով տարանցիկ ուղևորվել դեպի Նախիջևանի ինքնավար հանրապետություն։
«Ներկայումս մշակման փուլում են գտնվում տարանցման հավանական (ավտոմոբիլային) երթուղիները և կարգը, որում Հայաստանի բնակչության, ինչպես նաև օտարերկրացիների ու վերջիններիս պատկանող տրանսպորտային միջոցների տեղաշարժի համար որևէ տեղական և/կամ միջազգային (միջպետական) նշանակության ճանապարհների փակում և/կամ այլ սահմանափակումներ չեն նախատեսվում», - ասված է հաղորդագրությունում։
Ադրբեջանական լրատվամիջոցների հերթական այս տեղեկության հերքումը Ազգային անվտանգության ծառայության կողմից ևս մեկ անգամ վկայում է, որ խորքային գործընթացներում Հայաստանի դեմ լուրջ դավադրություն են նյութվում։ Ընդ որում որքան էլ Հայաստանի պատկան մարմինները փորձում են հերքել ադրբեջանական կողմի տեղեկությունները, ի վերջո հանկարծակի պարզվում է, որ այդ տեղեկությունները ոչ միայն հիմնավոր են, այլև հենց այդ ուղղությամբ էլ տանում են զարգացումները։
Եթե Հայաստանի տարածքով Ադրբեջանից Նախիջևան և հակառակ ուղղությամբ տարանցման ժամանակ Հայաստանի տեղական և միջազգային նշանակություն ունեցող ճանապարհները փակվելու են, ինչով խոչընդոտվելու է Հայաստանի բնակիչների ազատ տեղաշարժը, իսկ ադրբեջանցիները կարողանալու են իրենք ուղեկցել իրենց շարասյուները, ապա դա նշանակում է, որ Հայաստանի ինքնիշխանությունը բացարձակապես հավասարվում է զրոյի, իսկ Հայաստանը կորցնում է կարևորագույն գործառույթներից մեկը։
Ըստ էության, Ադրբեջանը հենց դրան էլ տանում է և պարտադրում է Հայաստանի Հանրապետությանը կատարել իր կամքը։ Հայաստանի իշխանությունները որևէ տեղեկատվություն չեն հայտնում ադրբեջանական լրատվամիջոցների տարածած մեկ այլ տեղեկատվության վերաբերյալ, որ Մոսկվայում օգոստոսի 30-ին կայանալու է Վլադիմիր Պուտինի, Իլհամ Ալիևի և Նիկոլ Փաշինյանի հանդիպումը։ Նշենք, որ հենց այդ տեղեկության մեջ նշվում էր, թե Ադրբեջանը կտրուկ դնելու է Զանգեզուրի միջանցքի հարցը։
Արամ Վիրաբյան
