Հայ-ադրբեջանական հանդիպում ժողովրդի թիկունքում
ՎԵՐԼՈՒԾՈՒԹՅՈՒՆՆԵՐ
Բրյուսելում հերթական տարօրինակ հանդիպումն է կայացել, որի վերաբերյալ տեղեկատվություն Հայաստանի քաղաքացիները ստանում են ոչ թե մեր պաշտոնական մարմիններից, այլ Հարավային Կովկասում և Վրաստանի ճգնաժամի հարցերով եվրամիության հատուկ ներկայացուցիչ Տոյվո Կլաարից։
Նա գրել է, թե Բրյուսելում լավ և առարկայական քննարկումներ ունեցան Հիքմեթ Հաջիևի և Արմեն Գրիգորյանի հետ՝ հայ-ադրբեջանական հարաբերությունների և այդ հարցում եվրամիության մասնակցության շուրջ։ Տևական ժամանակ նշվում է, որ Հայաստանի անվտանգության խորհրդի քարտուղար Արմեն Գրիգորյանը պետք է հանդիպի Ադրբեջանի նախագահի օգնական Հիքմեթ Հաջիևի հետ։ Մի քանի անգամ նույնիսկ այդ հանդիպումը չեղարկվել կամ հետաձգվել էր, ինչի մեջ ադրբեջանական կողմը մեղադրում է Հայաստանին։
Ըստ էության, այս հանդիպման վերաբերյալ որևէ նախապես հայտարարված բան տեղի չի ունեցել։ Ավելին ռուսական կողմը հայտնել էր, թե առաջիկայում բարձր և բարձրագույն մակարդակով հանդիպումներ պետք է կայանան։
Եվրամիությունը փորձում է իր ձեռքը վերցնել քննարկումների բանակցությունների նախաձեռնությունը և հայ-ադրբեջանական կարգավորումը իրականացնել եվրոպական կառույցների վերահսկողության ներքո։
Սորոսական անցյալով հայտնի Գրիգորյանն էլ թերևս, այս անգամ հանդիպել է Հիքմեթ Հաջիևի հետ՝ առանց ռուսական կողմին տեղեկացնելու, ինչը նշենք բավական լուրջ խնդիրներ կարող է առաջացնել Հայաստանի և Ռուսաստանի հարաբերություններում։ Առանց այն էլ, վերջին շրջանում բավական լարված են հատկապես «Սուրմալու»-ի իրավիճակի հետ կապված, ռուսական կողմը բավականին լուրջ նախազգուշացում է արել Հայաստանի իշանություններին։
Հայաստանի ԱԳՆ-ն այդ կապակցությամբ հայտարարել է, թե ստացել են Ռուսաստանի դեսպանության բողոքի նոտան և համապատասխան կարգով կպատասխանեն դրան, ինչը նշանակում է, որ հերթական անգամ Հայաստանի գործող վարչախումբը փորձում է ձգձգել, կտուրը գցել խնդիրը և ամեն կերպ սվաղել այն։ Թերևս Արմեն Գրիգորյանի այս հանդիպումն էլ լուրջ խնդիր է դառնալու, և ի վերջո Հայաստանի իշխանություններին հաջողվելու է լրջորեն զայրացնել Ռուսաստանի իշխանություններին, որոնք Ուկրաինայում իրենց բան ու գործը թողած ստիպված կլինեն զբաղվել Փաշինյանով և նրա սպասարկուներով։
Վահագն Կարապետյան
