Թուրք-ռուսական բանակցություններ «Զանգեզուրի միջանցքի» շուրջ․ որտե՞ղ է Հայաստանը

Օրեր առաջ Սոչիում Ռուսաստանի նախագահ Վլադիմիր Պուտինի և Թուրքիայի նախագահ Ռեջեփ Թայիփ Էրդողանի հանդիպման վերաբերյալ տարածած պաշտոնական տեղեկություններում որևէ բառ չկար, թե նրանք քննարկել են Հարավային Կովկասի և Լեռնային Ղարաբաղի հակամարտության հարցերը։ Թեև թե՛ ռուսական, թե՛ թուրքական աղբյուրները նախքան հանդիպումը նշում էին, որ այդպիսի քննարկում նախաձեռնվում է։

Երեկ Թուրքիայի առևտրի փոխնախարար և մաքսային վարչության պետ Ռեզա Թունա Թուրագայը հայտարարել է , թե Թուրքիան Ռուսաստանի հետ բանակցում է Զանգեզուրի միջանցքի բացման շուրջ։ Թուրագայը նշել է, թե Անկարայի և Բաքվի միջև առևտրային հարաբերությունների ընդլայնման կարևորագույն հարցերից մեկը Զանգեզուրի միջանցքի բացումն է։

«Այդ միջանցքի բացումը մեզ առավելություն կտա Ադրբեջան, իսկ այնտեղից մուտք գործելու Կենտրոնական Ասիայի երկրներ՝ ավելացնելու առևտրի ծավալները։ Մենք ակնկալում ենք, որ միջանցք կբացվի մոտ ապագայում»,- ասել է թուրք պաշտոնյան։ 

Միջանցքային տրամաբանության բացառման մասին բազմիցս խոսել են Հայաստանի պաշտոնյաները, այդ թվում անվտանգության խորհրդի քարտուղարը, վարչապետ Նիկոլ Փաշինյանը և այլոք։ Որքան էլ հայկական կողմը շարունակում է պնդել, թե որևէ միջանցքային տրամաբանություն չկա, իսկ եղածն էլ ձևակերպել են հայկական խաչմերուկ ոչինչ չասող արտահայտությամբ, ակնհայտ է, որ Թուրքիան և Ռուսաստանը լրջագույն բանակցային պրոցես են տանում իրար հետ Սյունիքով թուրք-ադրբեջանական տանդեմին միջանցք տրամադրելու հարցով, որի նկատմամբ նշենք հայկական կողմը, ըստ ամենայնի, վերահսկողություն չի ունենա, քանի որ հենց դա է թուրքական կողմի առաջին և գլխավոր պայմանը։ 

Լավագույն դեպքում ռուսական կողմը կարող է վերահսկողություն ունենալ, իսկ այդ պարագայում կրկին հարված է հասցվում Հայաստանի ինքնիշխանությանը։ Թերևս վաղուց արդեն կարելի է փաստել, որ Հայաստանի գործող իշխանությունները հնարավորինս նվազեցրել և շարունակում են նվազեցնել Հայաստանի ինքնիշխանությունը՝ հընթացս էլ խաբելով Հայաստանի քաղաքացիներին և «պոստ ֆակտում» գուժելով լրջագույն խնդիրների վերաբերյալ։

Գնել Խաչատրյան