Քննչական կոմիտեն ամփոփել է. ընդդիմադիրներին հետապնդում են, ոստիկաններին՝ խրախուսում

Քննչական կոմիտեն ամփոփել է «Դիմադրություն» շարժման ակցիաների ընթացքում հարուցված քրեական գործերի տվյալները։ Ըստ այդմ «Դիմադրություն» շարժման հավաքների ընթացքում մասնակիցների նկատմամբ բռնություն գործադրելու վերաբերյալ հարուցվել է 57 քրեական գործ։

Ըստ Քննչական կոմիտեի ոստիկանության՝ որևէ ծառայող մեղադրյալի կարգավիճակ չունի, մինչդեռ ոստիկանության ծառայողների նկատմամբ գործադրված բռնությունների այդ թվում Կառավարության 3-րդ մասնաշենքի և Կառավարական ամառանոցների մոտ տեղի ունեցած զանգվածային անկարգությունների դեպքերով հարուցվել է 9 քրեական գործ, ձերբակալվել է 28 անձ, նրանցից 21-ը կալանավորվել է։ Նույնիսկ պաշտոնական այս տվյալները վկայում են կողմնակալ մոտեցման մասին։

Շատ ավելի քիչ թվով քրեական գործերով մի ամբողջ շարք ընդդիմադիրներ հայտնվել են անազատության մեջ, բռնաճնշումների են ենթարկվում գործող իշխանությունների կողմից, մինչդեռ ոստիկանական լկտիությունների, ընդդիմադիրների նկատմամբ բռնությունների համար, որևէ ոստիկան այդպես էլ պատասխանատվության չի կանչվել, ավելին մամուլի բազմաթիվ միջոցներ գրում են, թե բռնություններ գործադրած շատ ոստիկանների պատժելու փոխարեն առաջխաղացում են տվել, պաշտոնի բարձրացումներ են ստացել, իսկ առավել ջերմեռանդ բռնարարները նաև պարգևատրվել են ոստիկանության ղեկավարության և գործող վարչախմբի կողմից։

Այս ամենը մեկ անգամ ևս վկայում է, որ Հայաստանի Հանրապետությունում որքան էլ փաշինյանական իշխանությունները հայտարարեն, թե պայքարում են ժողովրդավարության համար, իրականում բռնապետություն է, դրանից բխող բոլոր վատ հետևանքներով։ Գործող իշխանություններն իրենք էլ այլևս չեն թաքցնում իրենց բռնապետական հակումները, իսկ խամաճիկների վերածված իրավապահ մարմիններն ու դատարանները դակում են բոլոր ամոթալի պատվերները։ Հատուկենտ դատավորներ են միայն, ովքեր կարողանում են դեմ գնալ գործող վարչախմբին և չկատարել նրանց կամքը։

Նարեկ Կիրակոսյան