Թուրքական «սրտառուչ» դիվանագիտությունը

«Սուրմալու» առևտրի կենտրոնի ողբերգությանը հետևեցին բազմաթիվ երկրների պաշտոնյաների ցավակցական հեռագրերը։ Մարդիկ անկեղծորեն իրենց խորին ցավակցություններն էին հայտնում զոհերի հարազատներին, շուտափույթ ապաքինում մաղթում բոլոր վիրավորներին։

Բոլոր այս ցավակցությունների մեջ տարօրինակ և գրեթե արտառոց մի ցավակցություն կար. հայ-թուրքական հարաբերությունների կարգավորման գործընթացում Թուրքիայի հատուկ ներկայացուցիչ Սերդար Քըլըչի ցավակցությունը, ընդ որում նա «Թվիթեր»-ում իր գրառումը հասցեագրել է հայ-թուրքական բանակցություններում հայկական կողմի բանագնաց, Ազգային ժողովի փոխնախագահ Ռուբեն Ռուբինյանին և Հայաստանի արտգործնախարարությանը և բառացի նշել.

«Խորապես ցնցված եմ Երևանի կենտրոնում բացօթյա առևտրի կենտրոնում տեղի ունեցած հզոր պայթյունի մասին լուրից, ցանկանում եմ իմ անկեղծ ցավակցությունը հայտնել զոհերի ընտանիքներին և շուտափույթ ապաքինում մաղթել այս ողբերգության հետևանքով բոլոր վիրավորվածներին»,- գրել է Քըլըչը։

Թերևս առաջին անգամ է, որ թուրքական իշխանությունների կողմից Հայաստանում տեղի ունեցած որևէ ցավալի իրադարձության կապակցությամբ ցավակցության խոսքեր են հնչում։ Ամենևին անհրաժեշտ չէ դրանից ընկնել մեծ էյֆորիայի մեջ և այն դիտարկել որպես լուրջ ազդակ։ Սա սովորական շարքային դիվանագիտական ձևակերպում է։ Սերդար Քըլըչին և տարատեսակ «քըլըչների» բնավ էլ չի հետաքրքրում Հայաստանում ողբերգական որևէ իրադարձություն, ընդհակառակը ցանկացած նման իրադարձություն նրանք փորձելու են օգտագործել իրենց քաղաքական նպատակներով, ինչը և արվում է այս պարագայում։

Թուրքական իշխանությունները վերջին շրջանում չափազանց սիրալիր են դարձել Հայաստանի գործող իշխանությունների նկատմամբ, իսկ Սերդար Քըլըչի «սրտառուչ» վերաբերմունքը Ռուբեն Ռուբինյանի նկատմամբ, արձանագրել են նույնիսկ թուրքական լրատվամիջոցները, ինչը ևս մեկ անգամ վկայում է, որ Թուրքիան իր դիվանագիտական ամբողջ զինանոցը օգտագործում է հայ-թուրքական կարգավորումը իրականություն դարձնելու համար։ Թե ի՞նչ հետևանքներ դա կարող է ունենալ հետագայում Հայաստանի համար, ավելորդ է անգամ նշել, յուրաքանչյուր ողջամիտ մարդ էլ դա գիտակցում է։

Հայկ Կարապետյան