Ալիևը շարունակում է սպառնալ Արցախին

Մինչ Հայաստանի և Արցախի գործող իշխանությունները պատրաստվում են հանձնել Աղավնոն և Բերձորը, Ադրբեջանի նախագահ Իլհամ Ալիևը շարունակում է հոխորտալ և սպառնալիքներ հնչեցնել Արցախի հայ բնակչության հասցեին։

Երեկ Ադրբեջանի նախագահն այցելել է Իսմայիլի շրջան, որտեղ հարցազրույց է տվել ադրբեջանական հեռուստաընկերություններին, հայտարարել, թե Ղարաբաղում ապրող հայերը պետք է հասկանան՝ իրենց ապագան անցնում է ադրբեջանական հանրության մեջ ինտեգրվելու միջով։ Նա հայտարարել է, որ Ղարաբաղում ապրող հայերը չեն ունենա ո՛չ կարգավիճակ, ո՛չ անկախություն, ո՛չ որևէ հատուկ արտոնություններ։

«Ինչպես Ադրբեջանի քաղաքացիները, այնպես էլ նրանք, ինչպես պաշտպանվում են Ադրբեջանի քաղաքացիների իրավունքները, այնպես էլ՝ իրենցը, ինչպես պաշտպանվում են Ադրբեջանում ապրող ժողովուրդների իրավունքները, այնպես էլ՝ իրենցը»,- ասել է Ալիևը։

Հաշվի առնելով, թե ինչ վիճակում է գտնվում մարդու իրավունքների պաշտպանությունը Ադրբեջանում, ինչպես նաև Ադրբեջանում ապրող փոքրամասնությունների վիճակը, կարելի հստակ հասկանալ Ալիևի խոսքի ենթատեքստը։ Նա ամեն ջանք գործադրում է Արցախը վերջնականապես հայաթափելու, արցախահայությանը ուժով և հարկադրանքով ադրբեջանցի դարձնելու, կամ Արցախից վտարելու իր քաղաքականությունը։

Մինչդեռ Հայաստանի և Արցախի գործող իշխանությունները դարձել են նրա կամակատարը, առանց մտածելու անում են ցանկացած բան, ինչ պահանջում է Ալիևը, նույնիսկ Բերձորն ու Աղավնոն հանձնում են անվնաս տներով, որտեղ, իհարկե, գալու են և ապրեն ադրբեջանցիները։

Հայաստանի հաջորդ իշխանությունները՝ իշխանափոխության դեպքում, պետք է հստակ պարզեն, թե ինչպես է եղել, որ որոշվել է Աղավնոն և Բերձորը նման կերպ հանձնել Ադրբեջանին, իսկ մարդկանց կառուցած և շենացրած տները առանց վնասելու փոխանցել թշնամուն։

Ի՞նչ է սա, եթե ոչ դավաճանություն, միտումնավոր հայերին հասցված հարված և Ադրբեջանի շահերի սպասարկում։ Փաստն այն է, որ Ալիևը շարունակելու է նույն ոգով այնքան, որքան նրան թույլ տրվի այդ հնարավորությունը։

Ալեն Մարտիրոսյան