Թուրքերն այժմ պնդում են փակել Մեծամորի ատոմակայանը
ՎԵՐԼՈՒԾՈՒԹՅՈՒՆՆԵՐ
Թուրքիան և Ադրբեջանը կրկին խոսում են Մեծամորի ատոմակայանի վտանգավորության մասին։ Առայժմ միայն Թուրքիայի Իգդիրի լրագրողների համայնք կառույցի ղեկավար Այդըն Դենիզն է անդրադարձել ատոմակայանին՝ պնդելով, որ վերջինս իբր մեծ սպառնալիք է ներկայացնում առաջին հերթին Թուրքիայի, Ադրբեջանի, ապա նաև Ռուսաստանի, Վրաստանի, Իրանի և Միջին Ասիայի երկրների համար։
«Հակառակ այս ամենի ինչո՞ւ է Հայաստանը շարունակում օգտագործել այս ատոմակայանը, ոլորտում գործող մի շարք մասնագետների և միջազգային կառույցների կողմից Մեծամորի ԱԵԿ-ը ճանաչվել է աշխարհի ամենավտանգավոր և անվտանգության տարրերից զուրկ ատոմակայանը։ Կառուցումից ի վեր այն ենթարկվել է բազմաթիվ վթարների»,- ստել է Դենիզը՝ օրինակ բերելով 1980 թվականի Սպիտակի ավերիչ երկրաշարժը։
Նա նշել է, որ այս հարցում Ադրբեջանը և Թուրքիան պետք է համատեղ գործեն, որպեսզի ճնշում գործադրեն Հայաստանի վրա։ 44-օրյա պատերազմից հետո թերևս առաջին անգամ է, որ թուրքական կողմից Մեծամորի ատոմակայանի վերաբերյալ հայտարարություն է հնչում։ Տասնամյակներ շարունակ Մեծամորի ատոմակայանը որոշակիորեն զսպիչ դեր է կատարել տարածաշրջանում։ Եվ, ըստ էության, հայ-թուրքական և հայ-ադրբեջանական հարաբերությունների կարգավորման պատերազմում Հայաստանի կրած ջախջախիչ պարտությունից հետո վստահաբար կարելի էր արձանագրել, որ թուրքերը դնելու են նաև ատոմակայանի փակման հարցը։
Այն ոչ միայն Հայաստանի էներգետիկ անկախության լրջագույն գործոն է, այլ նաև զսպիչ գործոն տարածաշրջանի պետությունների համար, և սեփական երկրում ատոմակայան կառուցող Թուրքիան ամեն ինչ փորձելու է անել, որպեսզի Հայաստանին զրկի էներգետիկ անվտանգությունից և միջուկային թափոններ ունենալու հնարավորությունից։ Եվ այդ է պատճառը, որ առայժմ միայն թերևս քաղաքագիտական և լրատվական շրջանակներում է շրջանառվում ատոմակայանը փակելու պահանջը, սակայն չի բացառվում, որ ներքին խողովակներով, կամ առաջիկայում կրկին այս հարցը բարձրացնեն արդեն Հայաստանի ապիկար և դավաճան իշխանության առջև՝ պարտադրելով նաև որոշում կայացնել ատոմակայանը փակելու ուղղությամբ։
Փաշինյանական վարչախումբը ոչ միայն ատոմակայանը կփակի, այլ նաև ցանկացած այլ շինություն՝ ռազմավարական նշանակություն ունեցող, միայն թե արժանանա թուրք-ադրբեջանական տանդեմի բարեհաճությանը և նրանց միջոցով երկիրը կառավարելու հնարավորությունը երկարաձգի։
Վահե Երեմյան
