ԱԽՔ սկզբունքների տրանսֆորմացիան 8 տարում

«Պացիֆիզմը պատմության մեջ միշտ էլ ձախողվել է, որովհետև պացիֆիստները մի շատ կարևոր հանգամանք լավ չեն հասկացել՝ նոր միջազգային հարաբերությունների կառուցվածքը երբեք թույլ չի տա իրենց երազած խաղաղությունը կառուցել»։

Խելացի այս մտքի հեղինակը ոչ այլ ոք է, քան այսօր Հայաստանի անվտանգության խորհրդի քարտուղարի պաշտոնը զբաղեցնող և ադրբեջանական օրակարգն առաջ մղող, «խաղաղության դարաշրջանի» ջատագովներից Արմեն Գրիգորյանը։ Վերջինս ընդամենը 2014 թվականին խելացի մտքեր էր երկնում, նշում, թե առաջին հերթին անհրաժեշտ է միջազգային հարաբերությունների անարխիկ կառուցվածքը փոխել, իսկ դա պացիֆիստների ուժերից վեր է, ընդհանրապես բոլորի ուժերից վեր է, որը նշանակում է, որ պացիֆիստական ցանկացած շարժում ի սկզբանե ձախողված է։

«Խաղաղասեր Չեմբեռլենը կատաստրոֆիկ պատերազմ է բերել Անգլիայի գլխին»,- դեռ 8 տարի առաջ նշում էր հայկական Չեմբեռլենի վերածված Նիկոլ Փաշինյանի սպասարկու Արմեն Գրիգորյանը։

Ընդգծելով, թե խաղաղասիրական լոզունգներն ավելի սեքսի են, բայց ավելի աղետալի, Գրիգորյանը հայտարարում էր, թե պատերազմի պատրաստվողներն ավելի շատ խաղաղություն են բերել աշխարհին, քան խաղաղության պատրաստվողները։ Եվ այս անձն ընդամենը 8 տարի անց Հայաստանին պատրաստում է խաղաղության, իսկ պատերազմին ընդհանրապես չի պատրաստել։

44-օրյա պատերազմից գրեթե 2 տարի անց Հայաստանի զինված ուժերը գտնվում են նույն մեկնակետում, ծայրաստիճան ջախջախված, բարոյահոգեբանորեն մաշված և որևէ զենք, զինամթերք չի գնվել, ի տարբերություն մեր թշնամիների։ Այս ամենը ընդամենը վկայում է, որ փաշինյանական իշխանության ցանկացած ներկայացուցիչ ի սկզբանե անսկզբունքային է՝ հանուն սեփական որկորի հայրենիքը վաճառող, և պատրաստ են անցնել նույնիսկ ժամանակին իրենց հայտարարած մտքերի ու սկզբունքների վրայով, միայն թե կարողանան մնալ իշխանության և վայելել իշխանության կերակրատաշտը։

Արմեն Գրիգորյանի օրինակով արձանագրենք, որ գործ ունենք բացառիկ մի անսկզբունքային երևույթի հետ, որը ընդամենը 8 տարվա ընթացքում կարողացավ ոչ միայն ոչնչացնել սեփական ծննդավայր Արցախի անկախությունը, այլ նաև այժմ Փաշինյան Նիկոլի գլխավորությամբ նույնը փորձում է անել Հայաստանի Հանրապետության հետ։

Հովհաննես Ասատրյան