Հայկական շահերը ոտնահարվել են Էրդողան-Պուտին հանդիպմանը

Արդեն 3 օր է անցել Սոչիում Ռուսաստանի և Թուրքիայի նախագահներ Վլադիմիր Պուտինի և Ռեջեփ Թայիփ Էրդողանի հանդիպումից։ Հանդիպման վերաբերյալ պաշտոնական հաղորդագրություններում որևէ բառ նշված չէ, թե արդյո՞ք երկու երկրների նախագահները խոսել են Լեռնային Ղարաբաղի հակամարտությունից, թե՝ ոչ։ Մինչդեռ ՌԴ նախագահի մամուլի քարտուղար Դմիտրի Պեսկովը նախքան հանդիպումը հայտարարել էր, որ անպայման քննարկելու են նաև այդ հարցը։

Ռուսաստանից Թուրքիա վերադառնալու ճանապարհին՝ Էրդողանը օդանավում պատասխանել է լրագրողների հարցին և հաստատել, որ խոսել են նաև Ղարաբաղում ստեղծված լարվածությունից։ Էրդողանը կրկնել է իր դիրքորոշումը՝ ասելով, թե Ղարաբաղը գտնվում է Ադրբեջանի միջազգային ճանաչված սահմաններում, նա հավաստիացրել է, որ Թուրքիան կնպաստի Սևծովյան տարածաշրջանի խաղաղությանը և նշել, թե Վլադիմիր Պուտինը կիսում է իրենց արդար դիրքորոշումները։

Ընդամենը այս փոքր պարբերությունը վկայում է, որ Հայաստանի և Արցախի գլխին հերթական ամպերն են կուտակվում։ Պաշտոնապես որևէ բառ չասելով՝ Լեռնային Ղարաբաղի հակամարտության վերաբերյալ՝ երկու երկրների նախագահները իրենց 4 ժամ տևած բանակցությունների ընթացքում առնվազն լուրջ պայմանավորվածությունների են հանգել, իսկ նման պայմաններում, փաստն այն է, որ մշտապես խնդիրներ են առաջանում հայկական կողմի համար։

Թե՛ Ռուսաստանը և թե՛ Թուրքիան շարժվում են բացառապես սեփական շահերով և Հայաստանի ռազմավարական դաշնակցի համար խնդիր չէ ոտնահարել Հայաստանի և Արցախի իրավունքները, դրանք մանրադրամ դարձնել Թուրքիայի հետ հարաբերություններում, առավել ևս, որ Հայաստանի գործող իշխանություններն էլ ամեն ինչ անում են Ռուսաստանի հետ հարաբերությունները վատթարացնելու, խաղաղապահ առաքելությանը հարվածելու հարցում, և, ըստ էության, Ռուսաստանը կարծում է, թե բարոյական պարտավորություններ չունի ռազմավարական դաշնակցի նկատմամբ։ 

Գոռ Բաբայան