Իշխանական նոր սադրանք ընդդիմության դեմ

Գործող իշխանությունները հերթական անգամ փորձում են սադրել խորհրդարանական ընդդիմությանը, ստիպել նրան վայր դնել մանդատները։ Նախօրեին լրատվամիջոցներով տեղեկատվություն տարածվեց, թե «Հայաստան» խմբակցությունը ստորագրահավաք է սկսել, և ոչ միայն պատգամավորները, այլ նաև ցուցակով գրանցված բոլոր անդամները իբր ստորագրություն են տալիս, որ անհրաժեշտության պահին, եթե որոշեն հրաժարվել պատգամավորական մանդատներից, որոշումը այն բոլորի վրա է տարածելու։

«Հայաստան» դաշինքի պատգամավորները, ինչպես նաև դաշինքի ղեկավարությունն արդեն իսկ հերքել են այս տեղեկությունները, նշել, որ եթե իրենք սեպտեմբերին գնան խորհրդարան, ապա գնալու են բացառապես իրենց օրակարգով, իսկ մանդատները վայր դնելու հարցը չի քննարկվում։

Մեր տեղեկություններով՝ մանդատները դնելու վերաբերյալ լուրերը տարածել է իշխանությունը՝ փորձելով այդ կերպ հանրության շրջանում տպավորություն ստեղծել, թե ընդդիմությունը քննարկում է այդպիսի հարց, սակայն ի վերջո տուրք է տալիս մանդատները պահելուն, պատգամավորական մանդատից բխող վայելքներ օգտագործելուն և բացարձակապես մտադիր չէ հրաժարվել մանդատներից։ Մինչդեռ, փաստն այն է, որ խորհրդարանում «Քաղաքացիական պայմանագիր»-ը բացարձակ մեծամասնություն ունենալով՝ արհամարհում է ընդդիմության բոլոր նախաձեռնությունները, որևէ կերպ չի լսում քննադատություն, իսկ այժմ էլ փորձում է ընդհանրապես միայնակ մնալ խորհրդարանում և բոլոր օրենքները և նախաձեռնությունները դակել առանց ընդդիմության քննադատության։

Շատ վերլուծաբաններ թեև նշում են, թե մանդատները դնելու հանգամանքը հարող խորհրդարանական ճգնաժամ է հարուցելու, սակայն գործող Սահմանադրությունը լիովին տալիս է այդ հնարավորությունը, առանց ընդդիմության մասնակցության խորհրդարանական աշխատանքը շարունակելու, հետո էլ ժողովրդի մոտ չքմեղանալու, թե ընդդիմությունն ինքն է դրել մանդատները, իսկ իշխանությունը ինքնամոռաց աշխատում է։

Բաբկեն Մինասյան