Թուրքերի ախորժակը գնալով մեծանում է

Մինչ արսենթորոսյաններն ու փաշինյանական վարչախմբի մյուս կարկառուն ներկայացուցիչները հանրությանը պատրաստում են ցավոտ զիջումների, Թուրքիայի և Ադրբեջանի արտգործնախարարները կրկին բարձրացնում են Զանգեզուրի միջանցքի հարցը։

Երեկ Ուզբեկստանում կայացել է Թուրքիայի, Ուզբեկստանի և Ադրբեջանի արտաքին գործերի, էկոնոմիկայի և տրանսպորտի նախարարների առաջին եռակողմ հանդիպումը, ստորագրվել է Տաշքենդի հռչակագիրը։

Կայացած մամուլի ասուլիսում Թուրքիայի և Ադրբեջանի արտգործնախարարները կրկին խոսել են այդ միջանցքից, մասնավորապես Մևլյութ Չավուշօղլուն հայտարարել է, թե «Ադրբեջանի հաղթանակով պայմանավորված առաջացել է նոր աշխարհաքաղաքական հավասարություն, որտեղ շահում են այն երկրները, որոնք հանդես են գալիս Հարավային Կովկասում կայունության և համագործակցության օգտին։ Մենք աջակցում ենք Հայաստանի հետ Ադրբեջանի բանակցություններին տրանսպորտային հաղորդակցությունների, սահմանագծման և «Խաղաղության պայմանագրի» հարցերի վերաբերյալ, մենք նաև քայլեր ենք նախաձեռնում Հայաստանի հետ հարաբերությունների կարգավորման համար, մենք առաջ ենք ընթանում հատուկ բանագնացների բանակցությունների և Ադրբեջանի հետ խորհրդակցելու միջոցով»,- ասել է Չավուշօղլուն։

Ըստ էության, Չավուշօղլուն կրկին ընդգծել է, որ թուրք-ադրբեջանական տանդեմի համար կարևորագույն խնդիրը Զանգեզուրի միջանցքը խլելն է Հայաստանից, մինչդեռ դա նախապայման է հայ-թուրքական բանակցությունների կարգավորման գործընթացում։

Հիշեցնենք, որ օրեր առաջ էլ փաշինյանական այլ կարկառուններ՝ Էդուարդ Աղաջանյանն ու Մարիա Կարապետյանն էին Ազգային ժողովում հայտարարում, թե հայ-թուրքական բանակցություններում որևէ նախապայման գոյություն չունի։ Ըստ էության, կարելի է արձանագրել, որ Նիկոլ Փաշինյանն ինքն էլ համակերպվել է ստեղծված իրավիճակի հետ և պատրաստ է տալ ոչ միայն Զանգեզուրի միջանցքը, այլ նաև ցանկացած բան, միայն թե թուրքերն ու ադրբեջանցիները նրան օգնեն մնալ իշխանության ղեկին։ Եվ սա է ամենաողբերգական իրողությունը Հայաստանի Հանրապետության համար։

Իսկ երեկ ավելի ուշ Արցախի նախագահի գրասենյակից հայտնեցին ծանր լուրը, ադրբեջանական կողմը Արցախում տեղակայված խաղաղապահ զորակազմի միջոցով պահանջ է ներկայացրել առաջիկայում երթևեկությունը նոր երթուղով կազմակերպելու վերաբերյալ: 

Արեն Նահապետյան