Թուրքերը պատրաստվում են յուրացնել «Թուրանի ճանապարհը»

Հայաստանի իշխանությունը փորձում է համոզել՝ միջազգային տրամաբանություն հայ-թուրքական և հայ-ադրբեջանական բանակցություն գոյություն չունի։ Մինչդեռ, Ադրբեջանը շարունակում է պնդել Զանգեզուրի միջանցքի մասին, իսկ Թուրքիան էլ այդ միջանցքն անվանել է «միջին միջանցք» անունով։ Թուրքական իշխանամերձ «Սաբահ» թերթը հրապարակել է՝ «Թուրանի ճանապարհն է գալիս. թյուրքական պետություններն իրար է միացնելու» վերտառությամբ հոդված, որտեղ անդրադարձել է «Զանգեզուրի միջանցքին»՝ այն անվանելով «Թուրանի ճանապարհ»։

Ըստ թուրքական լրատվամիջոցի` Ղարաբաղի հաղթանակով Թուրքիայի և Ասիայի միջև միջանցք է բացվել, որը իրար կկապի 1,1 տրիլիոն դոլարի ՀՆԱ ունեցող թյուրքախոս երկրներին։ Նշում է, որ միջանցքի բացումով վերջ կդրվեն Վրաստանի և Իրանի տարածքով տարանցման վրա կիրառվող սահմանափակումներին։

Կայքի պնդմամբ նախատեսվում է, որ այդ ուղին բացվելու է այս տարի, իսկ դրա շահագործումից հետո Հարավային Կովկասում հնարավոր կլինի հիմք դնել տնտեսական համագործակցությանը։

Թուրքական կայքը որևէ կերպ չի շեշտում Հայաստանի մասին, ավելին հրապարակված լուսանկարում ամբողջ Սյունիքի մարզն է, մարզի վրա Զանգեզուրի միջանցք տերմինն են զետեղել, իսկ սահմանը վկայում է, որ անցնելու է Մեղրիի տարածքով։

Մինչ Հայաստանի իշխանությունները շարունակում են խաբել ժողովրդին և շեղել մարդկանց ուշադրությունը, թուրքական 2 պետությունները 44-օրյա պատերազմում Հայաստանին հաղթելուց հետո, այժմ էլ սեփական քաղաքական պլաններն են գծում, որտեղ Հայաստանին դրված է ընդամենը միջանցքի դեր, և որևէ մեկը մեր իշխանությունների և մեր պետության կարծիքը ընդհանրապես չի էլ հարցնում։

Այս պարագայում, փաստն այն է, որ Հայաստանի իշխանությունները երկրի գլխին կախված նոր խնդիրները հեռացնելու փոխարեն ավելի ու ավելի են խորացնում ճգնաժամը, իսկ՝ Հայաստանը վերածելով Թուրքիայի և Ադրբեջանի կցորդ պետության։

Նորայր Արշակյան