«Երևանյան աքլորը». ինչպե՞ս են շեղում հանրության ուշադրությունը

Հայաստանի գործող իշխանությունների ցանկացած նախաձեռնություն միտված է ոչ թե հանրության կյանքն ավելի թեթևացնելու, մարդկանց կարիքները հոգալու, այլ ավելի շատ մարդկանց ուշադրությունը առավել կարևոր իրադարձություններից շեղելուն։ Երևանի քաղաքապետ Հրաչյա Սարգսյանը հայտարարել է, թե քաղաքը պետք է շուտ արթնանա, և աշխատանքային օրը պիտի վաղ սկսի։ Այդ կապակցությամբ Սարգսյանը անհեթեթ մի որոշում է կայացրել։

Այսուհետ առավոտյան ժամը 7-ից յուրաքանչյուր ժամը մեկ Երևանի քաղաքապետարանի աշտարակային ժամացույցից լսվող երաժշտությունը կհնչի նաև միաժամանակ 12 վարչական շրջաններում։ Ավելի ուշ քաղաքապետարանը պարզաբանում տարածեց, թե դրա համար բարձրախոսներ են տեղադրվելու վարչական շրջանների վարչական շենքերի վրա։ Ըստ էության, այդ երաժշտությունը լավագույն դեպքում կլսեն մի քանի հարակից շենքերի բնակիչներ, որոնք էլ վաղ առավոտյան ժամը 7-ին ստիպված կլինեն հայհոյելով արթնանալ երաժշտության ժամանակ, ապա նաև շարունակել քնել։

Նման նախաձեռնության համար, եթե իշխանությունները ցանկանում էին աշխատանքային օրը վաղ սկսել, նախ առաջին հերթին պետք է խորհրդակցեին բժիշկների հետ, և երկրորդ՝ դրա համար նախ անհրաժեշտ էր ուսումնական հաստատությունների, պետական մարմինների, դպրոցների և այլ հաստատությունների աշխատանքը սկսել մեկ ժամ ավելի շուտ, քան ներկայումս է, դրանից հետո նաև կարելի էր պարտադրել արդեն մասնավոր ընկերություններին ևս շուտ սկսել իրենց աշխատանքը։ Եվ միայն այդ կերպ հնարավոր կլիներ հանրությանը սովորեցնել մեկ ժամ վաղ արթնանալուն, փոխարենը իշխանություններն սկսում են մի նախաձեռնություն, որը լավագույն դեպքում դարձել է սոցցանցային օգտատերերի ծաղրի առարկա։

Հրաչ Սարգսյանին և Երևանի քաղաքապետարանին ծաղրում են բոլորը, այդ թվում իշխանությանը լոյալ անձինք, ինչը վկայում է, որ այս նախաձեռնությունը ոչ այլ ինչ է, քան ընդամենը ևս մեկ օր հանրությանը զբաղեցնելու, նրանց ուշադրությունը երկրում ստեղծված ծայրահեղ ծանր իրավիճակից շեղելու միջոց։

Սարգիս Պետրոսյան