Թուրքիան շարունակում է նախապայմաններ առաջ քաշել, իսկ ՀՀ իշխանությունն իրեն պահում է ջայլամի պես

Հայաստանի գործող իշխանությունները մտադիր չեն արձագանքել Թուրքիայի արտգործնախարար Մևլյութ Չավուշօղլուի նախապայմաններին և սպառնալիքներին, ավելին Ազգային ժողովի Արտաքին հարաբերությունների հանձնաժողովի նախագահ Էդուարդ Աղաջանյանը Անկարայի հայտարարությունները նախապայման չի համարում:

Հիշեցնենք՝ նախօրեին Թուրքիայի ԱԳ նախարարը հայտարարել էր, Անկարան Երևանից հայտարարություններից զատ հստակ քայլեր է ակնկալում, Հայաստանը պետք է քայլեր ձեռնարկի այսպես կոչված`«Զանգեզուրի միջանցքի» բացման և Ադրբեջանի հետ խաղաղության պայմանագրի հարցում: Ընդ որում, Չավուշօղլուն «Զանգեզուրի միջանցքի» փոխարեն «Միջին միջանցք» եզրույթն էր օգտագործել։

Թեպետ ՀՀ իշխանությունները ամիսներ շարունակ պնդում են, թե բանակցություններն ընթանում են առանց նախապայմանների, իսկ հայ-թուրքական բանակցությունները շաղկապված չեն Ադրբեջանի հետ, Չավուշօղլուն այդ հարցում էլ է սառը ջուր լցրել նրանց եռանդի վրա: Թուրքիայի արտաքին գերատեսչության ղեկավարը բացահայտ ասել է, թե հայ-թուրքական կարգավորումը, ըստ էության, եռակողմ գործընթաց է, քանի որ իրենց քայլերը Ադրբեջանի հետ են համակարգում:

«Հայաստանին դուր է գալիս, թե ոչ, սա է իրականությունը: Մենք մեկ ազգ` երկու պետություն ենք: Այդ պատճառով, եթե տարածաշրջանում խաղաղություն է լինելու, բոլորը պետք է քայլեր անեն, այդ թվում` Վրաստանը, Միջին Ասիայի երկրները: Հայաստանից էլ այս հարցում կոնկրետ քայլեր ենք ակնկալում, լինեն դրանք Զանգեզուրի, համապարփակ խաղաղության պայմանագրի հարցում, թե մեզ ուղղված քայլեր», - շեշտել է նա:

Երկու օրվա ընթացքում Թուրքիայի ԱԳ նախարարի խոսքին անդրադարձել է միայն ԱԺ Արտաքին հարաբերությունների հանձնաժողովի նախագահը, այն էլ՝ ստիպված, Եվրախորհրդարանի պաշտոնյայի հետ համատեղ ասուլիսում։

«Կարծում եմ` Ձեր նշած հայտարարությունը, այնուամենայնիվ, նախապայման չէր: Թուրքիան, ըստ էության, մշտապես այս դիրքորոշմամբ է հանդես եկել, որը, բնականաբար, մեզ համար երբևէ ընդունելի չի եղել», - ասել է Աղաջանյանը:

Գործող վարչախումբը, իհարկե, խնդիր ունի համոզելու, թե հայ-թուրքական գործընթացն առանձին ուղղություն է և կապ չունի Լեռնային Ղարաբաղի խնդրի հետ, ուստի ընտրել են հնարավորինս լուռ մնալու մարտավարությունը։ Դա, սակայն, որևէ կերպ չի փրկում նրանց պատասխանատվությունից։ Թուրքիան իր արբանյակ Ադրբեջանի հետ գնալով ավելի է լկտիանալու, նորանոր զիջումներ է կորզելու փաշինյանական վարչախմբից, իսկ ՀՀ իշխանությունները պարզապես դարձել են այդ տանդեմի կցորդը։

Էդգար Առուստամյան