Նշան Դեպելյանը խոսել է Ռուսաստանի և Հայաստանի ֆուտբոլների հիմնական տարբերության մասին
ՍՊՈՐՏ
Championat.com-ը գրում է, որ Ռուսաստանում և Հայաստանում հայտնի ֆուտբոլային գործակալ Նշան Դեպելյանը խոսել է այն մասին, թե ինչով է տարբերվում ֆուտբոլը երկու երկրներում։
«Ժամանակակից հայկական ֆուտբոլի հիմնական տարբերությունը ռուսական ֆուտբոլից բյուջետային ֆինանսավորման գրեթե իսպառ բացակայությունն է։ Միայն մեկ ակումբ՝ «ԲԿՄԱ»-ն է հանդիսանում ֆեդերացիայի նախագիծը, մնացածը մասնավոր են։
«Ալաշկերտ»-ը մի տեղացի գործարարինն է, «Նորավանքն» ունի ամերիկացի ներդրող, «Արարատի» մասին հոգում են Շվեյցարիայի հայերը, իսկ մնացած հինգ ակումբները վերահսկվում են Ռուսաստանից հայազգի գործարարների կողմից։
«Ուրարտուն» պատկանում է Չելոյանցին (ավելի քան 10 տարի եղել է Մոսկվայի «Սպարտակի» տնօրենների խորհրդի անդամ), «Փյունիկը» Սողոմոնյանինն է, «Արարատ-Արմենիան» Կարապետյանինը (2015 թվականին գլխավորել է Ռուսաստանի առևտրային անշարժ գույքի ամենաազդեցիկ սեփականատերերի վարկանիշը), «Նոյը» Գևորգյաններն է (ռեստորանային և առևտրային բիզնես Դոնի Ռոստովում), «Վանի» սեփականատեր Ղուկասովը նույնպես Ռուսաստանից է։
Բնականաբար, ռուսական ֆուտբոլային շուկան բոլոր առումներով ավելի մոտ է ու հասկանալի հայերին, քան մյուսներինը։ Եվ քանի որ ֆուտբոլում ներդրվող գումարը մասնավոր է, ուրեմն ներդրողները դրանք ծախսում են իրենց հայեցողությամբ։
«Արարատ-Արմենիան» համարվում է ամենահարուստը երկրում, «Փյունիկը» երկրորդ տեղում է։ Բյուջեի ճշգրիտ չափը չեմ նշի, բայց կարող եմ ենթադրել, որ առաջատար ակումբներն ունեն տարեկան մինչև 5 միլիոն դոլար շրջանառություն»,- ասել է Նշան Դեպելյանը «Championat» թերթի թղթակից Օլեգ Լիսենկոյին տված հարցազրույցում։
Նյութը հրապարակման պատրաստեց Կամո Խաչիկյանը
