ԱՄՆ ԿՀՎ ղեկավարի այցի իրական նպատակները

ԱՄՆ Կենտրոնական հետախուզական վարչության ղեկավար Ուիլյամ Բերնսը երեկ մի քանի ժամով անակնկալ այց էր կատարել Երևան և հանդիպել Նիկոլ Փաշինյանի, Անվտանգության խորհրդի քարտուղար Արմեն Գրիգորյանի հետ։

Հայաստանի կառավարության մամուլի ծառայությունից հայտնում են, թե Փաշինյանի հետ հանդիպմանը քննարկել են միջազգային և տարածաշրջանային անվտանգությանը, ահաբեկչության դեմ պայքարին վերաբերող հարցեր, անդրադարձել են նաև Հարավային Կովկասի տարածաշրջանում տեղի ունեցող գործընթացներին: Իսկ Արմեն Գրիգորյանի հետ քննարկել են Հայաստան-ԱՄՆ երկկողմ հարաբերությունների հետագա զարգացմանն առնչվող հարցեր:

Գրիգորյանը ներկայացրել է տարածաշրջանային անվտանգության միջավայրը, առկա մարտահրավերները և տարածաշրջանում խաղաղության հաստատման Հայաստանի մոտեցումը։ Նրանք խոսել են Հայաստան-Ադրբեջան և Հայաստան-Թուրքիա բանակցային գործընթացների մասին։

ԿՀՎ տնօրենի այցն այս օրերին չափազանց տարօրինակ է։ ՀՀ իշխանությունները չէին մեկնաբանում ռուսական լրատվամիջոցների տարածած տեղեկությունները, ո՛չ հերքում, ո՛չ հաստատում էին, միայն վերջում պաշտոնական հաղորդագրություններ տարածեցին։

Մեր տեղեկություններով, այցի նպատակները բոլորովին այլ են եղել։ Ըստ հավաստի աղբյուրների՝ նա ժամանել էր ոչ թե Հայաստանի իշխանություններին, այլ ռուսական իշխանության ներկայացուցիչներին հանդիպելու համար, իսկ Երևանը պարզապես ամենահարմար վայրն էր դրա համար։

Այդ հանդիպումների առաջին և հիմնական թեման Ուկրաինան է, և այժմ կողմերը բանակցում են հատուկ ծառայությունների մակարդակով։ Ուկրաինայում հակամարտության կողմերն արդեն գնում են բանակցությունների, քննարկում պատերազմից հետո նոր աշխարհակարգի կանոնները։ Քննարկել են նաև կովկասյան տարածաշրջանում ստատուս-քվոյի հարցը, այդ թվում Հայաստանի շուրջ զարգացումները, հայ-ադրբեջանական, հայ-թուրքական հարաբերությունների կարգավորումը։ Հայաստանն ընդամենը տարանցիկ կետ է այս հարցերում։

Գևորգ Հայրապետյան