Փաշինյանն՝ ընդդեմ բանակի
ՎԵՐԼՈՒԾՈՒԹՅՈՒՆՆԵՐ
Հայաստանի Ազգային ժողովը երեկ 55 կողմ ձայներով և ընդդիմության բացակայության պայմաններում ընդունեց Պաշտպանության մասին օրենքում կառավարության առաջարկած փոփոխությունները։ Այսօր նստաշրջանը շարունակվելու է, և ամենայն հավանականությամբ նախագիծը երկրորդ ընթերցում կանցնի։
Թեև Պաշտպանության նախարար Սուրեն Պապիկյանը փորձում էր համոզել, թե փոփոխությունների իրականացումը բանակում բարեփոխումների շրջանակներում է, և իրենց նպատակը բանակում լուրջ փոփոխություններ անելն է, այդուհանդերձ հստակ է, որ գործող իշխանությունները գնում են բանակը իրենց տոտալ վերահսկողության տակ վերցնելու ճանապարհով։
2020 թվականի պատերազմում կրած պարտությունից հետո, երբ Զինված ուժերի մի շարք գեներալներ և գնդապետներ հանդես եկան Նիկոլ Փաշինյանի հրաժարականի պահանջով, ակնհայտ էր, որ Փաշինյանը իշխանությունը պահելու մի տարբերակ ունի՝ ամեն գնով բանակը իր կրնկի տակ մտցնել:
Հայաստանի Հանրապետությունը մինչ օրս Զինված ուժերի գլխավոր շտաբի պետ չունի, ժամանակավոր պաշտոնակատար է, որն առանձնապես մեծ հարգանք և հեղինակություն չի վայելում Զինված ուժերում։ Իսկ լուրջ և հեղինակավոր զինվորականի այդ պաշտոնին նշանակելը հղի է իշխանափոխության վտանգով։
Այդ նպատակով էլ փաշինյանական վարչախումբը նախաձեռնել է Գլխավոր շտաբի պետի պաշտոնը նվազեցնելու, նրան Պաշտպանության առաջին փոխնախարար դարձնելու իր նախագիծը։ Ընդ որում այդ նախագծում նշվում է, որ Պաշտպանության նախարարի բացակայության պայմաններում, Գլխավոր շտաբի պետ, Պաշտպանության առաջին փոխնախարարը չի կարող փոխարինել Պաշտպանության նախարարին, այլ կփոխարինի փոխնախարարներից որևէ մեկը։
Սա բացահայտ անարգանք է Հայկական բանակի նկատմամբ և վստահաբար ցույց է տալիս, որ գործող իշխանությունները որևէ կերպ չեն վստահում Հայաստանի Զինված ուժերին։ Հատկապես այս պայմաններում, երբ երկիրը կանգնած է գոյաբանական լրջագույն խնդիրների առջև, բանակի նկատմամբ նման վերաբերմունքը, նախագծով ներկայացվող փոփոխությունները, ոչ այլ ինչ են, քան հերթական դավադրություն Հայաստանի Հանրապետության դեմ՝ բանակը թուլացնելու, վարկաբեկելու և ստորացնելու։
Տարոն Դանիելյան
