Ջհանգիրյանը հեռացավ, բայց ոչ ձայնագրության պատճառով

Բարձրագույն դատական խորհրդի նախագահի պաշտոնակատար Գագիկ Ջհանգիրյանը երեկ հրաժարական է տվել ԲԴԽ անդամի պաշտոնից։ ԲԴԽ մամուլի խոսնակի փոխանցմամբ, Ջհանգիրյանը հրաժարականը ներկայացրել է առողջական խնդիրների պատճառով, ինչը նույնիսկ տարակուսելի և ծիծաղելի է համարվում փաշինյանական վարչախմբի ներկայացուցիչների կողմից։

Հիշեցնենք, որ հունիսի 20-ին ԲԴԽ նախկին նախագահ Ռուբեն Վարդազարյանը հրապարակել էր իր և Ջհանգիրյանի մասնակցությամբ անցյալ տարվա փետրվարին տեղի ունեցած զրույցի ձայնագրություն, որտեղ Ջհանգիրյանը հորդորում էր Վարդազարյանին ինքնակամ հեռանալ խորհրդի նախագահի պաշտոնից և խոստանալով, որ նրա դեմ քրեական գործեր չի հարուցվի։

Ձայնագրության հրապարակումից հետո նույնիսկ փաշինյանական իշխանությանը լոյալ իրավապաշտպանները նշում են, որ սա արդարադատության իրական խոչընդոտման փորձ է, և Ջհանգիրյանը անպայման պետք է հեռացվի ԲԴԽ անդամի իր պաշտոնից։

Իշխանությունը որևէ կերպ չէր մեկնաբանում, և, ընդամենը, միայն Նիկոլ Փաշինյանը իր առցանց ասուլիսում մտահոգիչ էր համարել այս ձայնագրության փաստը։ Թերևս միայն մեր լրատվական միջոցն էր, որ նշել էր, որ Ջհանգիրյանին ցանկանում են հեռացնել, սակայն խնդիրը ամենևին էլ ձայնագրությունը չէ, Նիկոլ Փաշինյանը ցանկանում էր օգտագործել այս իրավիճակը Ջհանգիրյանին հեռացնելու և այդ կերպ իշխող վարչախմբի մեջ Խաչատուր Սուքիասյանի և նրա մերձավորների դիրքերը թուլացնելու նպատակով։

Ջհանգիրյանը, նշենք, Խաչատուր Սուքիասյանի խնամին է, իսկ Սուքիասյանը տևական ժամանակ է ինչ իշխանության մեջ սեփական լծակներն ու ազդեցությունն է թարմացնում, որպեսզի անհրաժեշտության դեպքում կարողանա խլել իշխանությունը Նիկոլ Փաշինյանից։ Եվ այժմ Ջհանգիրյանը հրաժարական է տալիս հենց այդ պատճառով, այլ ոչ թե ձայնագրության։ Իսկ Բարձրագույն դատական խորհրդի պաշտոնը Նիկոլ Փաշինյանը նախատեսել է գլխավոր դատախազի պաշտոնը լքող Արթուր Դավթյանի համար։ Վերջինս 4 տարվա մեջ, թեև առանձնապես չի փայլել ո՛չ իրավական գիտելիքներով, ո՛չ էլ նախկինների դեմ արդյունավետ պայքար մղելով, սակայն Փաշինյանը նրա դեմ բավականին շատ կոմպրոմատներ ունի Դավթյանի պոչը իր կրնկի տակ պահելու համար։

Վահան Գրիգորյան