Ռուսաստանը դուրս է մղում Արևմուտքին, իսկ Ադրբեջանը շարունակում է սպառնալ
ՎԵՐԼՈՒԾՈՒԹՅՈՒՆՆԵՐ
Ռուսաստանն ամբողջ թափով լծվել է Հարավային Կովկասից Արևմուտքին դուրս մղելու գործին՝ այդ նպատակի համար օգտագործելով նաև ԼՂ հակամարտությունը։ Մինչ ԱՄՆ-ը, Ֆրանսիան և Հայաստանի գործող իշխանությունները շարունակում են պնդել ԵԱՀԿ Մինսկի խմբի հովանու ներքո բանակցությունները շարունակելու անհրաժեշտության մասին, ՌԴ ԱԳՆ ղեկավար Սերգեյ Լավրովը երեկ բաց տեքստով Բաքվում հայտարարել է, որ ԵԱՀԿ ՄԽ գոյություն չունի այլևս։
Ռուսաստանի արտգործնախարարը հայտարարել է, թե Մինսկի խմբի հարցը Բաքվում ընդհանրապես չի քննարկել, և որ ղարաբաղյան վերջին պատերազմից հետո բանակցային այդ գործընթացի աշխատանքն անցյալում է մնացել։ Դիրքորոշում, որ մինչ այդ նաև Ադրբեջանի նախագահն էր պնդում։
«Այն առաջարկները, որոնք եղել են և որոնք երկար տարիներ քննարկվել են՝ առանց տեսանելի արդյունքների, կորցրել են իրենց այժմեականությունը։ Տեղի ունեցած իրադարձությունները հետևում են թողել այդ փաստաթղթերը, դա ուղղակի օբյեկտիվ իրականություն է», - ասել է Լավրովը։
Լավրովը միաժամանակ պնդել է, թե 44-օրյա պատերազմից հետո տարածաշրջանում նոր գործընթացներ են սկսվել՝ հակամարտության հետևանքները վերացնելու ուղղությամբ, և հատուկ շեշտել, որ այդ գործընթացների հիմքում եռակողմ հայտարարություններն են՝ Հայաստանի, Ադրբեջանի և Ռուսաստանի առաջնորդների միջև։ Լավրովի հետ համատեղ ասուլիսում Ադրբեջանի ԱԳ նախարար Ջեյհուն Բայրամովը ևս պնդել է, թե Ուկրաինայի դեմ սկսված պատերազմից հետո Մինսկի խումբը դադարեցրել է աշխատանքը։ Դա, սակայն, չպետք է խանգարի Հայաստանի ու Ադրբեջանի միջև հարաբերությունների կարգավորմանը, ասել է Բայրամովը, սպառնալով, թե «ձեռք բերված պայմանավորվածությունների արհեստական ձգձգումը վտանգավոր կարող է լինել Հայաստանի համար»։
Հայաստանից հնչած արձագանքը, այս անգամ զարմանալիորեն կցկտուր և խեղճացած չէր։ ԱԳՆ նախարար Արարատ Միրզոյանը հայտարարել է, թե հայկական կողմը հետևողական է խաղաղության հաստատման մեր օրակարգում, իսկ առաջարկները Ադրբեջանին ներկայացրել են ԵԱՀԿ Մինսկի խմբի համանախագահ երկրների միջոցով։ Միրզոյանը Ադրբեջանին մեղադրել է միտումնավոր բանակցությունները տորպեդահարելու մեջ։ Ռուսաստանի հասցեին, իհարկե, որևէ թթու բառ չի ասվել, բայց կրկին ընդգծել են ԵԱՀԿ ՄԽ բարձր հովանին։
Արմեն Մովսիսյան
