Ռուբեն Վարդազարյանի ապտակը փաշինյանական վարչախմբին

Բարձրագույն դատական խորհրդի՝ լիազորությունները կասեցված նախագահ Ռուբեն Վարդազարյանը սենսացիոն ձայնագրություն է տարածել, որն արվել է 2021 թվականի փետրվարի 20-ին։ Գագիկ Ջհանգիրյանը մասնավոր զրույցում Ռուբեն Վարդազարյանին վարչապետի անունից առաջարկել է հրաժարական ներկայացնել ԲԴԽ նախագահի պաշտոնից, ինչին ի պատասխան վերջինս ժամկետ է խնդրել։

Հրապարակված ձայնագրության մեջ Վարդազարյանի հարցին, թե Ջհանգիրյանի ինչի՞ն է պետք այս ամեն ինչը, վերջինս պատասխանել է․ «Ես չեմ ուզում Քոչարյան Ռոբերտը հետ գա, հազիվ էդ կլանից պրծել ենք։ Եթե ես իմանամ՝ Վանեցյանն է գալու, Ղազինյան Արթուրն է գալու, կգնամ իրանց կողքին կկանգնեմ, բայց ես գիտեմ՝ որ նա է գալու ու դաշնակները։ Սերժն էլ չի գալու, լավ իմացիր»։

Մեկուկես տարի ԲԴԽ նախկին նախագահի դեմ բռնաճնշումներն ու վերջինիս պահվածքը զարմացնում են շատերին, Վարդազարյանը բավական պինդ է կանգնած իր իրավունքների պաշտպանության հարցում, և չի վարանում տեղը դնել կապերը կտրած Ջհանգիրյանին։ Վարդազարյանը երկար տարիներ դատական համակարգում է, գործող իշխանությունների համար սարսափելի կերպար է դարձել։

Փաշինյանն ու նրա թիմը համոզված են, որ Վարդազարյանի ձեռքին շատ նյութեր կան գործող իշխանավորների դեմ, նա այն անձանցից է, որ տեղյակ է այս կամ այն իշխանական գործչի կալանքի սանկցիաներից՝ ում գործակալն են, և այլն։ Միևնույն ժամանակ Փաշինյանը նաև հրաշալի հասկանում է, որ իր միակ հենարանը մնացել է ուժային կառույցը, իսկ Դիմադրության շարժման ընթացքը ցույց տվեց, որ Նիկոլ Փաշինյանը չունի սոցիալական հենարան, որ իր համար դուրս գա փողոց։ Իշխանությանը մնացել է միայն բռնելը, ծեծելը, ինչպես ցույց տվեցին Ապարանի դեպքերը, նաև գնդակահարելը։

Նիկոլ Փաշինյանը համոզվել է, որ դեռ կարող է հույս դնել ոստիկանության, Հակակոռուպցիոն և քննչական կոմիտեների վրա, առաջիկայում էլ կզավթի իշխանությունը դատախազությունում՝ իր օգնական Աննա Վարդապետյանի միջոցով, բայց ի վերջո, բոլոր հարուցված գործերը գնալու են դատարան, որտեղ նույնիսկ Ջհանգիրյանի և խամաճիկ դատավորների առկայությանը, զգալի է Ռուբեն Վարդազարյանի ազդեցությունը, այսինքն՝ Փաշինյանը չունի լիակատար վերահսկողություն։ Իրավական այդ մի օղակն էլ զավթելու ճանապարհին Նիկոլ Փաշինյանը միջոցների մեջ խտրականություն չի դնում, բայց հենց առաջին իսկ փորձից ապտակ ստացավ՝ հրապարակված ձայնագրության տեսքով: Թե ինչեր են պարզվելու առաջիկայում, կարելի է միայն գուշակել։

Թաթուլ Ղազարյան