Մենք չենք վարում գրագետ ագրարային քաղաքականություն, հիմա եկել է բացասական հետևանքները մարսելու ժամանակը

«Վերին Լարս» անցակետում արդեն երկար ժամանակ է, ինչ մեքենաները կանգնած վիճակում են։ Օրերս խնդրի լուծման համար տեղի ունեցավ ՀՀ էկոնոմիկայի նախարար Վահան Քերոբյանի հանդիպումը Ռուսաստանի տնտեսական զարգացման նախարար Մաքսիմ Ռեշետնիկովի հետ: Հայտնում են, որ «Վերին Լարսի» անցակետային թողունակությունը կմեծանա 6,4 անգամ՝ օրական դրանով կկարողանա անցնել ավելի քան 2,5 հազար ավտոտրանսպորտային միջոց՝ մինչև 3000-ը հասցնելու հնարավորությամբ։

Այս պահի դրությամբ օրական բաց է թողնվում միջինը 800-1000 բեռնատար ավտոմեքենա` օրական 400 ավտոմոբիլային միջոցի ընդհանուր անձնագրային հնարավորության պայմաններում: Սրան զուգահեռ՝ հանրապետությունում ամենօրյա տեմպով գյուղմթերքի գնաճ է արձանագրվում: 

«Իրազեկ և պաշտպանված սպառող» ՀԿ նախագահ Բաբկեն Պիպոյանի խոսքով՝ փաստ է, որ մենք չենք վարում գրագետ ագրարային քաղաքականություն.

«Իսկ եթե լավ չենք վարում ագրարային քաղաքականությունը, դա նշանակում է, որ ինչ որ-պահի պետք է դրա հետևանքները մարսել։ Հիմա եկել է այդ բացասական հետևանքները մարսելու ժամանակը։ Ինչ վերաբերում է գյուղացու այդտեղից շահած դուրս գալուն՝ առաջին հայացքից կա ազգային վիճակագրական ծառայության տվյալ, որ բանջարեղենը 40 տոկոս թանկացել է և թվում է թե գյուղացին պետք է գոհ լինի։ Բայց մտեք գյուղեր և տեսեք՝ գյուղացին գո՞հ է, թե՞ ոչ։ Գյուղացու մոտ դժգոհություն կնկատեք, որովհետև ըստ էության գյուղացու հոգսն էլ է շատացել, գնաճին նաև ազդում է պարարտանյութի և մնացած ծախսերի ավելացումը։ Եվ որ ասում ենք վարել գրագետ ագրարային քաղաքականություն, սրա համար ենք ասում։

Սկսած նրանից, որ մենք պետք է հասկանանք արտահանման ճյուղերը որոնք են, ինչ մթերք պետք է արտահանենք, որ գները բալանսավորված մնան, գնային կարգավորման մեխանիզմ ունենաք, որ այն ապրաքը որը գյուղացին պետք է վաճառի էժան, մենք կարողանանք բացված տարբերությունը տալ, որ եթե գյուղացին որոշի ավելի բարձր գնով վաճառել, կարողանանք զսպող գործողություն կիրառել։ Հիմա երբ մենք ագրարային քաղաքականություն չենք վարում, ոլորտում խնդիրները խորանում են։ Եթե արտանահության հետ կապված խնդիրն ինչ-որ միջամտությամբ կարող է լուծվել, բայց դա չի նշանակում որ մենք սկսեցինք ոլորտում գործ անել։ Կամ միայն արտահանման խնդիրը լուծելով գյուղատնտեսությունը չի զարգանում»,- 1or.am-ի հետ զրույցում նշեց Պիպոյանը:

Մարիամ Նալբանդյան