Վիրավորանքի համար այլևս չեն կալանավորի․ ո՞վ է եղել ճնշում գործադրողը
ՎԵՐԼՈՒԾՈՒԹՅՈՒՆՆԵՐ
Հուլիսի 1-ից ուժի մեջ մտնող Քրեական նոր օրենսգրքում այլևս չի լինի խիստ քննադատության արժանացած ծանր վիրավորանքի հոդվածը, իսկ այդ արարքի համար քաղաքացիները կտուգանվեն միայն Քաղաքացիական օրենսգրքով սահմանված մինչև 3 միլիոն դրամի չափով։ Օրենքի այդ դրույթը ուժի մեջ մնաց մեկ տարուց էլ պակաս ժամանակահատված, արժանացավ իրավապաշտպանների, քաղաքական ուժերի և միջազգային կառույցների խիստ քննադատությանը, մինչդեռ գործող իշխանությունները հասցրեցին մի շարք ընդդիմախոսների ուղարկել ճաղերի ետևը՝ իրենց քննադատելու համար։
Իսկ այսօր գործող իշխանությունը վիրավորանքի ապաքրեականացումը փորձում է ներկայացնել որպես իր բարի կամքի դրսևորում, հընթացս էլ ազդարարելով, իբր այս ընթացքում իրավիճակը փոխվել է դրական ուղղությամբ։ Այդուհանդերձ, վիրավորանքի ապաքրեականացումը բնավ էլ փաշինյանական վարչախմբի բարի կամքի արտահայտությունը չէ, այլ միջազգային կառույցների, մասնավորապես Հայաստանում ԵՄ պատվիրակության ղեկավար Անդրեա Վիկտորինի ճնշման արդյունք։ ԵՄ պատվիրակությունն ու իր ղեկավարը վերջին շրջանում արդարացիորեն հայտնվել են հանրության քննադատության թիրախում, բայց ակնհայտ կատարած դրական քայլը արժե շեշտել։ Հենց նա է Վենետիկի հանձնաժողովի և այլ կառույցների հետ աշխատանքի արդյունքում հասել օրենքի դրույթի ապաքրեականացմանը։
Մեր տեղեկություններով, իշխանությունները բոլորովին ցանկություն չեն ունեցել կորցնել իրենց ձեռքի մահակը, սակայն ստիպված են եղել կատարել միջազգային կառույցի պարտադրանքը։ Այժմ էլ վարչախումբն այլ մեթոդներ է մտմտում՝ ընդդիմախոսներին ճնշելու ուղղությամբ։
Գևորգ Առաքելյան
