Պարզ է, որ սա ունի քաղաքական պատվերի տեսք. արդեն նկատելի է դրամի արժեզրկման գործընթացը
ՏՆՏԵՍՈՒԹՅՈՒՆՀՀ Կենտրոնական բանկի կայքից տեղեկանում ենք, որ դոլարն ու եվրոն սկսել են արժևորվել. դոլարի առքի նվազագույն գինը 421 դրամ է, վաճառքինը՝ 432 դրամ, վաճառքի առավելագույն գինը 435 դրամ է։ Եվրոն բանկերում գնվում է առավելագույնը 435 դրամով, վաճառվում՝ 451 դրամով, վաճառքի առավելագույն գինը 465 դրամ է։
Հատկանշական է, որ արժույթների արժևորումը նկատվում է վերջին երկու օրերին և բավականին սրընթաց կերպով: Ի՞նչ պատահեց, որ հանկարծ գործընթացը հակառակ կողմով է ընթանում, 1or.am-ը փորձել է պարզել Թադևոս Ավետիսյանի հետ զրույցում.
«Կարճ և պարզ ասեմ, ես դա կանխատեսել էի սրանից առաջ, որ այս վիճակը լինելու է կաճաժամկետ, և արդեն նկատելի է դրամի արժեզրկման գործընթացը։ Ես վստահ եմ, որ տնտեսական օրենքներին հակառակ որևէ կերպ չի ստացվելու։ Ինչու՞ են այսպես անում, ինչու՞ է նաև Կենտրոնական բանկը բարձր պահում վերաֆինանսավորման տոկոսադրույքը։ Պարզ է, որ սա ունի քաղաքական պատվերի տեսք, որովհետև առանց այն էլ աշխարհաքաղաքական սպառնալիքների այս իրավիճակում և մեծ քաղաքական լարվածության ֆոնին չեն ուզում առավելապես կաշկանդել գնաճը և դրանով պայմանավորված՝ սոցիալական լարվածության խորացումը։ Դա է հիմնական պատճառը, այսինքն մենք իրականում այսօր ունենք մոտավորապես 40 տոկոսին մոտ գնաճային ֆոն, կեսն արդեն իրողություն է և մենք դա տեսնում ենք, մյուս կեսը, հակադրվելով տնտեսական կանոններին, փորձում են ինչ-որ չափով երկարաձգել։
Չի ստացվելու, և նաև վստահ եմ, որ տապալելու են այս պրոցեսը։ Կարճ ասած՝ ի՞նչ տարբերություն գներն են բարձրանում, թ՞ե մարդկանց իրական եկամուտներն են նվազում։ Դրանք նույնն են։ Այսինքն փաստորեն տնտեսթյունը, ազգային եկամուտները, տուգանում են մարդկանց, որպեսզի կարողանան ինչ որ չափով գնաճի դեմն առնել, և դա տապալելու են և ի վերջո առաջնային շուկայի հնարավոր շոկը, որ մենք ունենալու ենք, բերելու է ոչ միայն սոցիալական հետևանքներ գնաճի տեսքով, այլ նաև տնտեսական շատ կոնկրետ հետևանքների։ Արդեն արտահողները և նաև արտարժույթով եկամուտ ունեցող տնտեսվարողները լրացուցիչ իրական ռիսկեր ունեն, և դա ևս չի կարող երկար տևել»։
Մարիամ Նալբանդյան
