Մարտահրավեր՝ կեղծ ընդդիմության համար․ ստիպված են ինքնաբացահայտվել

Դիմադրության շարժման կողմից Ֆրանսիայի հրապարակից վրանները հեռացնելն իշխանության և մերձիշխանական շրջանակների` հատկապես կեղծ ընդդիմադիր միավորների համար առիթ էր ծաղրելու ընդդիմությանը, նշելու իբր նրանց մարտավարությունը ձախողվեց, և հասարակությունը չգնաց իրենց հետևից։ Ընդ որում բավական լավ և լայնածավալ հակաքարոզչություն է գնում ընդդիմության դեմ, ինչը վկայում է, որ իշխանությունը ոչ այնքան ուրախացել է Ֆրանսիայի հրապարակից վրանները հանելու փաստից, այլ գիտակցում է, թե ինչ խնդիրներ դա կարող է հարուցել։ Ըստ էության, այդ մասին իրենց խոսքում ակնարկում են նաև ընդդիմադիր գործիչները, երբ պսևդոընդդիմությանը հրավիրում են արդեն իրենց բացակայության պայմաններում Ֆրանսիայի կամ Ազատության հրապարակ՝ դիմադրության դրոշը բարձրացնելու և Նիկոլ Փաշինյանի դեմ պայքարելու համար։

Իրականում հստակ է, որ Հայաստանում չկա այլ ընդդիմություն, քան այն, ինչ ունենք այսօր, որը շարունակում է իր գործողությունները։ Դրանց արդյունավետության մասին կարելի է երկար վիճել։ Փաստն այն է, որ որևէ այլ քաղաքական ուժ չունի այն ռեսուրսները, հնարավորություններն ու մարդկային զանգվածը, որպեսզի կարողանա պայքարել գործող իշխանությունների դեմ։ Ուստի ստացվում է, որ Ֆրանսիայի հրապարակն ազատելը մարտահրավեր է նաև կեղծ ընդդիմադիր միավորումների համար։ Նրանք այլևս չունեն հնարավորություն հայտարարելու, թե ընդդիմությունը զավթել է ընդդիմադրի տեղը՝ իրենց զրկելով պայքարելու հնարավորությունից։

Ըստ էության, տեղի է ունենում լյուստրացիա՝ ընդդիմության ընդդիմության շարքերում։ Այժմ նրանք ստիպված են լինելու պատասխանել հանրության հարցերին, թե ինչո՞ւ մեկուկես ամիս շարունակ ծաղրում էին ընդդիմադիր պայքարը, անվանարկում և վարկաբեկում, իսկ այսօր պարզապես դարձել են Նիկոլ Փաշինյանի օրակարգի կրողները և որևէ գործուն քայլ չեն ձեռնարկում իշխանության դեմ պայքարելու համար։ Անկեղծ ասած, այդ ուժերն իրենք էլ հասկանում են իրենց առջև ծառացած մարտահրավերները, նույնիսկ չի բացառվում մեկ, երկու հուսահատ փորձ ձեռնարկեն՝ ցույց տալու համար, թե իբր իրենք էլ պայքարում են իշխանության դեմ, ինչը, իհարկե, համաձայնեցված է լինելու Նիկոլ Փաշինյանի վարչախմբի հետ։

Արսեն Հակոբյան