Օգոստոսի 2-ը՝ ջրբաժան․ ընդդիմությունն էլ կարող է կոմպրոմատներ օգտագործել

Օգոստոսի 2-ը շրջադարձային կարող է լինել Նիկոլ Փաշինյանի և նրա իշխանության համար։ Բանն այն է, որ այդ օրը լրանում է նրա վարչապետ ընտրվելու 1 տարին, որից հետո ընդդիմադիր քաղաքական ուժերը կարող են իմպիչմենտի գործընթաց նախաձեռնել։ Երեկվանից սկսած՝ այդ մասին ակնարկում է նաև ընդդիմությունը՝ նշելով, որ կվերադառնա խորհրդարան բացառապես իրենց օրակարգով։ Պատգամավոր Գեղամ Մանուկյանը ևս հստակ արձանագրել է օգոստոսի 2-ի հավանականության մասին, նշելով, որ իրենք քննարկումներ են անցկացնում Նիկոլ Փաշինյանին իմպիչմենտ հայտարարելու վերաբերյալ։ Առաջին հայացքից սա կարող է թվալ անհեթեթ քայլ, սակայն իշխանության ներսում տեղի ունեցող խորքային գործընթացներին ծանոթ մարդիկ, բնավ չեն հերքում այդ հավանականությունը։

Դեռևս օրեր առաջ գրել էինք, որ իշխանությունը իր մեծ խմբակցության պատգամավորների զգալի մասին կրնկի տակ է պահում տարատեսակ կոմպրոմատների, սեռական արկածների, ֆինանսական բնույթի ապօրինությունների մասին տեղեկություններով։ Ըստ էության, այդպիսի տեղեկությունների տիրապետում են նաև ընդդիմադիրները, և իշխանության համար պայքարում չի բացառվում, որ նրանք նույնպես օգտագործեն այդ փաստը խորհրդարանական իշխող խմբակցության մի շարք պատգամավորների դեմ՝ նրանց ստիպելով մասնակցել Նիկոլ Փաշինյանին իմպիչմենտ հայտարարելու գործընթացին։

Մեկ այլ կարևոր հանգամանք է այն, որ իշխող ուժի շարքերում շատերը պարզապես պատանդ են գտնվում Նիկոլ Փաշինյանի ձեռքին և բոլորովին դեմ չեն լինի ազատվել նրանից։ «Քաղաքացիական պայմանագիր» կուսակցությունում գտնվող բազմաթիվ անձինք հասկանում են, որ ստեղծված իրավիճակը, ինչպես նաև ըստ տարբեր տեղեկությունների սեպտեմբերին Ադրբեջանի հետ պայմանագիր կնքելու Նիկոլ Փաշինյանի պարտադրանքը, իրենց համար կարող է ճակատագրական նշանակություն ունենալ։ Շատերը հստակ հասկանում են, որ դա լուրջ ջրբաժան է լինելու յուրաքանչյուր հայի և Հայաստանի քաղաքացու համար։

Որքան Նիկոլ Փաշինյանն է փորձել օգտագործել այդ կոմպրոմատներն իր սեփական թիմակիցների դեմ, նույն կերպ էլ իշխանության ներկայացուցիչների դեմ այդ կոմպրոմատները կօգտագործեն նաև ընդդիմադիրները։ Նման կոմպրոմատների գոյության մասին, հիշեցնենք, նշել էր «Քաղաքացիական պայմանագիր» խմբակցության նախկին պատգամավոր, ներկայումս ընդդիմության շարքերը համալրած ըմբշամարտիկ Արսեն Ջուլֆալակյանը։

Գևորգ Բաբայան