Նիկոլ Փաշինյանը գցո՞ւմ է թիմակիցներին

«Քաղաքացիական պայմանագիր» կուսակցությունը հետաձգել է իր համագումարը և այն կանցկացնի սեպտեմբերին։ Այդ համագումարում ընտրելու են կուսակցության ղեկավար մարմին, վարչության անդամների 15 տեղի համար առաջադրվել են 48 թեկնածուներ, հիմնականում պաշտոնյաներ, պատգամավորներ, «Քաղաքացիական պայմանագիր» կուսակցությունից հինավուրց և նոր անդամներ։

Զարմանալիորեն գործող վարչության կազմից մի քանիսը չեն առաջադրվել։ Եթե Լիլիթ Մակունցի դեպքում հասկանալի է՝ նա նշանակվել է դիվանագիտական աշխատանքի և չի կարող ֆիզիկապես մասնակցել վարչության նիստերին, ապա մյուս թեկնածուների դեպքում չառաջադրվելը լուրջ մտորումների տեղիք է տալիս։ Չեն առաջադրվել արտգործնախարար Արարատ Միրզոյանը, Նիկոլ Փաշինյանի եղբորորդի Սիփան Փաշինյանը, ով նաև այս գումարման պատգամավոր չդարձավ, չի առաջադրվել Նարեկ Բաբայանը, վերջինիս փոխարեն սակայն առաջադրվել է նրա կինը։

«Քաղպայմանագրի» նախկին վարչության անդամներից այս անգամ չի առաջադրվել «Հայկական ժամանակ»-ի նախկին լրագրող, ներկայումս պատգամավոր՝ Վահագն Հովակիմյանը, վերջինս համարվում է Նիկոլ Փաշինյանի ամենամտերիմ անձանցից մեկը, «Հայկական ժամանակ»-ում նրա բոլոր հանձնարարություններն անվերապահ կատարողը և իրավական հարցերով վարչապետի առաջատար խորհրդականներից է։

1or.am-ի հետ զրույցում Վահագն Հովակիմյանը հրաժարվել է մեկնաբանել վարչության անդամի համար չառաջադրվելու հանգամանքը, սակայն թե՛ մեր լրատվամիջոցին, թե՛ այլ լրատվամիջոցների ասած նրա խոսքերից կարելի է ենթադրել, որ Հովակիմյանը լուրջ նեղացած է Նիկոլ Փաշինյանից։ Ըստ էության, Վահագն Հովակիմյանի հետ կատարվածը վկայում է, որ Նիկոլ Փաշինյանը կայուն չէ նաև մարդկային հարաբերություններում և կարող է առանց խղճի խայթի հրաժարվել իր մերձավոր զինակիցներից։

Քառամյա պաշտոնավարման ընթացքում իշխանության ֆավորիտների ցուցակը շատ արագ է փոխվում, մարդիկ երբեմն դառնում են հանրապետության առաջին կամ երկրորդ մարդը իրենց ազդեցությամբ Նիկոլ Փաշինյանից հետո, շատ արագ էլ կորցնում են իրենց պարագլխի բարեհաճությունը։ Այս ամենը պետք է դաս լինի նաև «Քաղպայմանագրի» մյուս ներկայացուցիչների համար, հստակ հասկանան, որ Նիկոլ Փաշինյանը դեմ չի լինի հրաժարվել իր յուրաքանչյուր զինակցից, եթե դրա անհրաժեշտությունը ծագի։ Ինքը՝ Հովակիմյանը, կպահպանի պատգամավորի պաշտոնը առնվազն մինչև այս գումարման խորհրդարանի ավարտը և կկատարի Նիկոլ Փաշինյանի նորանոր կեղտոտ հանձնարարությունները, իսկ ի՞նչ կլինի դրանից հետո նրա հետ, կամ ի՞նչ է կատարվում այժմ, մտորումների լուրջ պատճառ է կողմնակիցների համար։

Արմեն Մելիքյան