Շիրակի մարզպետն ու եղբայրը «պատերա՞զմ» են հայտարարել Պապիկյանի ազգականին

Շիրակի մարզպետ Նազելի Բաղդասարյանի եղբայրը՝ Արման Բաղդասարյանը, ով հանդիսանում է Գյումրու ավագանու «Քաղաքացիական պայմանագիր» խմբակցության անդամ, իր ֆեյսբուքյան էջում գրառում էր կատարել՝ տեղեկացնելով, որ դուրս է գալիս «Քաղաքացիական պայմանագրից», վայր է դնում ավագանու իր մանդատը։ Այնուհետև հայտնի դարձավ, որ Բաղդասարյանի եղբայրը փոշմանել է և մանդատից չի հրաժարվի: Նազելի Բաղդասարյանը իր եղբոր տրամադրությունների փոփոխությունը չցանկացավ մեկնաբանել` նշելով, որ դա նրա անձնական որոշումն է: Ի դեպ, այն ժամանակ hayeli.am-ի ունեցած տեղեկություններով՝ մանդատը վայր դնելու պատճառը եղել է այն, որ վերջինիս և Գյումրում փոխքաղաքապետ Արթուր Պապիկյանի միջև, ով «Քաղաքացիական պայմանագիր» կուսակցության վարչության նախագահ Սուրեն Պապիկյանի հորեղբոր որդին է, տեղի է ունեցել ծեծկռտուք։

Այսօր էլ մարզպետի եղբայրը բավական ուշագրավ գրառում է արել, որտեղ Գյումրիի փոխքաղաքապետ Պապիկյանին անուղղակի կերպով անգրագետ է անվանել: Ահա թե ինչ է նա գրել իր ֆեյսբուքյան էջում. «Ուրեմն, էս մեր առաջին տեղակալը ինքը լինելով գործող ավագանի` փաստացի կամ չի տիրապետում, կամ միտումնավոր նսեմացնում է ավագանու դերը համայնքի կառավարման մեջ, չեմ ուզում հավատալ, որ միտում կա, ուստի կենթադրեմ, որ տարրական անգրագիտության հետ գործ ունենք (համայնքապետի հետ մեկտեղ 10֊ից ավելի օգնական ու  խորհրդական ունեն, գոնե մեկը հուշեր(Սուլթանյանը հաստատ գիտեր), որ ոտքը քարին է դեմ առնելու))։ Հիմա մենք ի՞նչ ունենք. «‎բամբասանքի» ու լատինական սերիալների սիրահարար քաղաքային իշխանություն, որն իրեն վերապահել է դատախազության և դատարանի  դերը, ընկերներ, լա՞վ չեք»։

Մինչ ՏԻՄ ընտրությունները մամուլը գրում էր, որ Գյումրիի փոխքաղաքապետի պաշտոնում ՔՊ-ն առաջադրելու է հենց Նազելի Բաղդասարյանի եղբորը, սակայն հետագայում եկան կոմպրոմիսի, որ այդ պաշտոնը կզբաղեցնի Պապիկյանի ազգականը: Ինչպես երևում է` Բաղդասարյանները չեն հաշտվել այդ իրողության հետ, որ եղբայրը զրկվել է փոխքաղաքապետի աթոռից, քույրն էլ, ըստ էության, Գյումրիի ստվերային քաղաքապետը դառնալու հնարավորությունից: Եվ այսօր ՔՊ-ականների միջև իսկական գզվռտոց է սկսվել՝ իհարկե, հանուն պաշտոնի: Դժվար չէ կռահել, թե ովքեր են տուժելու ՔՊ-ականների այս հերթական ռազբորկայից` իհարկե, ՀՀ հպարտ քաղաքացիները, այս դեպքում Շիրակի մարզի հպարտ քաղաքացիները....