Զատուլինի արցախյան հանդիպման տողատակերը․ ռուսական համայնքը՝ անվտանգության երաշխի՞ք

Ռուսաստանի պետական դումայի պատգամավոր Կոնստանտին Զատուլինի այցը Հայաստան բավական ուշագրավ զարգացումներ է ունեցել։ Հիշեցնենք Զատուլինը հունիսի 1-ից 4-ը Հայաստանում էր. նպատակն էր ծանոթանալ հասարակական-քաղաքական իրավիճակին և արցախյան հակամարտության կարգավորման գործընթացին, ռուսաստանցի հայրենակիցների հետ կապերի զարգացմանը։

Զատուլինը հանդիպել է Լեռնային Ղարաբաղի բոլոր նախկին նախագահներին՝ Ռոբերտ Քոչարյանին, Արկադի Ղուկասյանին, Բակո Սահակյանին նաև գործող նախագահ Արայիկ Հարությունյանին։ Պետդումայի պատգամավորի տելեգրամյան ալիքում տարածված հաղորդագրության մեջ հատկապես ուշագրավ է այն հանգամանքը, որ նա զրուցել է Արցախում ռուսական խաղաղապահ զորակազմի հրամանատար, գեներալ-մայոր Անդրեյ Վոլկովի և Արցախի ռուսական համայնքի ղեկավար Ալեքսանդր Բորդովի հետ։

Կոնստանտին Զատուլինը Պետական դումայում զբաղեցնում է ԱՊՀ գործերի և հայրենակիցների հետ կապերի հանձնաժողովի առաջին տեղակալի պաշտոնը, և Արցախում ռուսական համայնքի ներկայացուցչի հետ հանդիպումը բավական մտորումների տեղիք է տալիս։ Ըստ էության, որոշ վերլուծաբաններ Զատուլինի և Ալեքսանդր Բորդովի հանդիպումը, որպես հավասարը հավասարին, պայմանավորում են այն հանգամանքով, որ Արցախում կարող են պետք լինել ինչ-ինչ սցենարների դեպքում գնալ աբխազական կամ մերձդնեստրյան տարբերակով, այսինքն Արցախում ոչ միայն ազգությամբ ռուսների, այլ նաև Արցախի բազմաթիվ բնակիչների ռուսական անձնագրեր տրվեն։ Սա կարող է նշանակել, որ Արցախը դիտարկում է որպես իր հայրենակիցների պաշտպանության տարբերակ։ Բնականաբար խաղաղապահ մանդատը, որը տրվել է 5 տարով, չի գոհացնում ռուսական կողմին, նրանք փորձելու են պատրվակներ փնտրել հետագայում ևս խաղաղապահ գործունեությունը ամրապնդելու, Հարավային Կովկասում ավելի ամրանալու համար, և իրենք են այժմ փորձում իրավիճակ ստեղծել, որպեսզի նախ ավելացնեն Արցախում Ռուսաստանի քաղաքացիների թիվը, երկրորդ՝ հստակ արձանագրեն, որ Արցախում գոյություն ունի ռուսական փաստաթղթավորված և իրավաբանական կարգավիճակ ունեցող համայնք։

Զատուլինի և ռուսական համայնքի ղեկավարի այս հանդիպումը լուրջ հույսեր են ներշնչել նաև Արցախում։ Այն բանից հետո, երբ Արցախի քաղաքական ուժերը և բնակիչները հասկացան, որ Նիկոլ Փաշինյանն ու իր վարչախումբը ձեռքերը լվացել են Արցախից և իջեցնում են նշաձողը, Արցախի բնակչության փրկության ճանապարհներից մեկը կարող է լինել դե ֆակտո և դե յուրե Ռուսաստանի հետ իրավական հարաբերություններ հաստատելը։ Իսկ ռուսական համայնքի թվաքանակի մեծացումը լրջորեն նպաստելու է այս տարբերակի առաջմղմանը։

Արման Առաքելյան