Ռուսական տհաճ անակնկալ Փաշինյանին
ՎԵՐԼՈՒԾՈՒԹՅՈՒՆՆԵՐՀայաստանում ներքաղաքական լարվածության ֆոնին ռուսական պաշտոնական շրջանակները տհաճ անակնկալ մատուցեցին Նիկոլ Փաշինյանին և նրա վարչախմբին։ Ռուսաստանի Պետդումայի պատգամավոր, ԱՊՀ գործերի և հայրենակիցների հետ կապերի կոմիտեի նախագահի առաջին տեղակալ Կոնստանտին Զատուլինը հունիսի 1-ից 4-ը հանդիպել է Արցախի բոլոր նախկին նախագահների՝ Ռոբերտ Քոչարյանի, Արկադի Ղուկասյանի, Բակո Սահակյանի, Արայիկ Հարությունյանի, նաև Արցախում ռուսական խաղաղապահ զորակազմի հրամանատար, գեներալ-մայոր Անդրեյ Վոլկովի և Արցախի ռուսական համայնքի ղեկավար Ալեքսանդր Բորդովի հետ։
Ինչպես նշվել է հաղորդագրությունում, ուղևորության նպատակը ծանոթանալն էր ընթացիկ հասարակական-քաղաքական իրավիճակին, արցախյան հակամարտության կարգավորման գործընթացին և ռուսաստանցի հայրենակիցների հետ կապերի զարգացմանը։ Կոնստանտին Զատուլինը միշտ է համարվել ՌԴ-ում Հայաստանի լուրջ լոբբիստներից մեկը, նաև Ռոբերտ Քոչարյանի մտերիմն է և հայաստանյան ընդդիմության առաջնորդի լուրջ լոբբինգով է զբաղված։ Այդուհանդերձ, մինչ վերջերս Ռուսաստանը առանձնապես չէր միջամտում հայաստանյան ներքաղաքական զարգացումներին՝ զերծ մնալով իր դիրքորոշումները արտահայտելուց։ Գործող վարչախումբն այդ հանգամանքը օգտագործում էր հայ հանրության մեջ արմատավորելու, իբր Նիկոլ Փաշինյանն ունի ռուսական «դաբռոն»։
Այժմ Զատուլինի այցը, Արցախի նախկին նախագահներին հանդիպելու փաստը լրջորեն մտահոգել է վարչախմբին, հատկապես ներքաղաքական և արտաքին քաղաքական մարտահրավերների, թե՛ Ռուսաստան-Արևմուտք լարվածության, թե՛ արցախյան հարցերում լուրջ զարգացումների ֆոնին։
Այսօր Երևան է այցելում ՌԴ Պետդումայի նախագահ Վյաչեսլավ Վոլոդինը, առաջիկայում սպասվում է նաև ՌԴ ԱԳ նախարար Սերգեյ Լավրովի այցը և մասնակցությունը ՀԱՊԿ նիստերին։ Այն պայմաններում, երբ Փաշինյանը, Ալիևի հետ ձեռք-ձեռքի տված, փորձում է արցախյան կարգավորման բանալիները հանձնել Եվրամիության ձեռքը, Ռուսաստանի այս ակտիվացումը, Հայաստանի ընդդիմադիր շրջանակներին աջակցությունը, գործող վարչախմբին հասցեագրվող ազդակները խարխլել են վարչախմբի հիմքերը։
Ընդդիմությունն իր հերթին, մտադիր է ռուսական պատվիրակությունների այցերի օրերին աղմուկ բարձրացնել, բողոքի գործողություններ անցկացնել, ցույց տալու, թե ով է փողոցի իրական տերը։ Ըստ էության, փաշինյանական իշխանությանը վատ օրեր են սպասվում։ Արդյո՞ք Լավրովն էլ կհետևի Զատուլինին, և կհանդիպի ընդդիմության որևէ առաջնորդի, օրինակ՝ Ռոբերտ Քոչարյանի հետ։ Այդ հարցի պատասխանը պարզ կլինի առաջիկայում։
Կարեն Մարտիրոսյան
