Կարեն Կարապետյանի տարօրինակ հանձնարարությունը

Մոսկվայից վերադարձից հետո կառավարության առաջին նիստում Կարեն Կարապետյանը հանդես է եկել ուշագրավ հանձնարարությամբ: «Հանձնարարում եմ՝ Զբոսաշրության պետական կոմիտեին, այլ շահագրգիռ կառույցների և մասնավոր հատվածի հետ աշխատելով ապահովել ՌԴ քաղաքացիների համար զբոսաշրջության ծառայությունների լայն փաթեթ», հայտարարել է Կարեն Կարապետյանը:

 Ռուսաստան կատարած այցի ընթացքում Կարապետյանը ՌԴ կառավարության հետ պայմանավորվեց Ռուսաստանի քաղաքացիներին Հայաստան իրենց ներքին անձնագրով այցելության հնարավորություն տալու հարցում: Կարեն Կարապետյանը հունվարի 26-ի նիստում հանձնարարել է ԱԱԾ-ին մինչեւ մարտ լուծել տեխնիկական խնդիրները:

 Կառավարության այդ նախաձեռնությունը լիովին հասկանալի է: Ռուսաստանի քաղաքացիները ապրում են «խորհրդային» կարգով՝ նրանք ունեն ներքին անձնագիր, իսկ արտերկիր մեկնելու համար պետք է ձեռք բերեն արտասահմանյան անձնագիր: Ընդ որում, այդ անձնագրի ձեռքբերումը Ռուսաստանում պահանջում է տեւական ժամանակ: Դժվար չէ պատկերացնել նաեւ ռուսական բյուրոկրատիայի վիճակը:

 Ռուսաստանի քաղաքացիներին տալով Հայաստան առանց արտասահմանյան անձնագրի, ներքին անձնագրով այցելելու հնարավորություն, փաստացի նրանց հնարավորություն է ընձեռվում ճանապարհորդել առանց ավելորդ բյուրոկրատական քաշքշուկի, ինչը կարող է նրանց համար գրավիչ դարձնել այցերը Հայաստան:

 Ներկայում Ռուսաստանի քաղաքացիների համար այդպիսի կարգ կիրառում են Բելառուսը, Կիրգիզիան, Ղազախստանը:

 Հայաստանի համար զբոսաշրջությունը տնտեսության կարեւոր ճյուղ է, մի շարք տեսանկյուններից: Ամենակարեւորը՝ այն որոշակի ինքնաբավ զարգացման հնարավորություն տվող ճյուղ է, որտեղ բավական մեծ տեղ կա նաեւ փոքր ու միջին ձեռնարկատիրության զարգացման համար: Ռուսաստանի քաղաքացիներն այդ իմաստով կարող են լինել Հայաստանի համար կարեւոր ռեսուրս, որն իհարկե պետք է թիրախավորել:

Օրինակ, ՌԴ քաղաքացիները զգալի զբոսաշրջային ռեսուրս են դարձել հարեւան Վրաստանի համար, եւ նկատելի է, որ Վրաստանը աշխուժորեն աշխատում է այդ ուղղությամբ: Իհարկե Վրաստանում նրանք չունեն ներքին անձնագրով այցելության հնարավորություն, բայց, միեւնույն ժամանակ, թե ռուսաստանցիների, թե ընդհանրապես արտասահմանցիների համար զբոսաշրջային գրավչության տեսանկյունից մի շարք գործոնների շնորհիվ Վրաստանն առավել գրավիչ է, ի տարբերություն Հայաստանի:

 Այդ իմաստով, գրավչության արագ քայլերից մեկը կարող է լինել անձնագրային «արտոնությունը», որ Հայաստանի կառավարությունն ընձեռում է ՌԴ քաղաքացիներին:

 Բայց,  մյուս հանգամանքը՝ նրանց համար զբոսաշրջային ծառայությունների լայն փաթեթի ձեւավորումը, իսկապես ուշագրավ է: Ինչու՞ միայն ՌԴ քաղաքացիների համար: Զբոսաշրջային ծառայությունների լայն փաթեթ պետք է պատրաստել Հայաստան այցելող բոլոր զբոսաշրջիկների համար: Իհարկե, նրանց նախասիրությունները տարբեր են, մի բան կարող են ակնկալել կամ մի բան կարող է հետաքրքրել եվրոպացիներին, այլ բան՝ ամերիկացիներին, ճապոնացիներին, չինացիներին, իրանցիներին, ռուսներին: Դա ինքնին հասկանալի է: 

Հիմա, Կարեն Կարապետյանը պատրաստվում է ամեն կառավարության նիստի հատուկ հանձնարարել լայն փաթեթներ պատրաստել տարբեր երկրների քաղաքացիների համա՞ր, թե՞ Ռուսաստանի քաղաքացիները նրա համար ունեն հատուկ աստիճան եւ նրանք առանձնահատուկ դասի զբոսաշրջիկներ են, որոնց հանդեպ անհրաժեշտ է հատուկ մոտեցում:

 Համենայն դեպս, վարչապետի հանձնարարությունն այդ իմաստով իսկապես տարօրինակ է: Այն, որ թե պետական կառույցները, թե մասնավոր սեկտորը, որ ներգրավված է  զբոսաշրջության բիզնեսում, ունեն առավել աշխույժ եւ կրեատիվ քայլերի անհրաժեշտություն, անկասկած է: Բայց այդ աշխուժությունն ու կրեատիվությունը պահանջվում է բոլոր երկրներից հնարավոր զբոսաշրջիկների հանդեպ, նույնիսկ Վրաստանից, որպեսզի օրինակ այցելուների հերթ գոյանա ոչ միայն հայ-վրացական սահմանային անցակետերի հայկական մասում՝ դեպի Վրաստան, այլ նաեւ հակառակը:

Նյութի աղբյուրն՝ այստեղ