Ով ինչ ուզում՝ անում է, իսկ ՄԻՊ-ը քնած է հայտնի կենդանու ականջում. Կարեն Քոչարյան
ՔԱՂԱՔԱԿԱՆՈՒԹՅՈՒՆՈստիկանական ուժերը շարունակում են բերման ենթարկել փողոցներում անհնազանդության ակցիաներ իրականացնող ընդդիմադիրներին: Քիչ առաջ, բազմաթիվ քաղաքացիների թվում, բերման ենթարկվեցին նաև Արմեն Աշոտյանն ու Նաիրա Զոհրաբյանը, իսկ Լևոն Քոչարյանը ֆեյսբուքյան ուղիղ եթերով հայտնեց, որ ոստիկանական բաժանմունքներում արդեն տեղ չկա, որպեսզի տեղավորեն նոր բերման ենթարկվածներին:
Քաղտեխնոլոգ Կարեն Քոչարյանի խոսքով` ոստիկանության «կարմիր բերետավորների» պահվածքը ոստիկանին հարիր չէ.
«Ուզում եք` գեստապո անվանեք, ուզում եք` ժանդարմերիա, ինչ անուն ուզեք կարող եք տալ, բացի ոստիկանությունից: Երիտասարդ կա` թևն են կոտրել, երեկ ինչ-որ պապիկի էին թևերը ոլորած տանում: Ով ինչ ուզում՝ անում է, իսկ ՄԻՊ-ը քնած է հայտնի կենդանու ականջում, միայն հոգեբանական աջակցություն են ցուցաբերում բերման ենթարկվածներին, մինչդեռ այս պահին հոգեբանական աջակցություն այս իշխանություններին է միայն պետք»,- 1or.am-ի հետ զրույցում ասաց Քոչարյանը:
Անդրադառնալով Ավետիք Չալաբյանի կալանավորման վերաբերյալ հարցին` քաղտեխնոլոգը նշեց.
«Որոշ շատ կեղծ օրինապաշտներ ասում են՝ ոնց կլինի, չի կարելի հերոսին կալանավորել, չի կարելի բարերարին կալանավորել: Իհարկե, եթե մարդը օրենք է խախտում կամ, եթե երկրում ընդհանուր իրավասություն է, բոլորին էլ կարելի է ձերբակալել, եթե մարդն օրենք է խախտել: Բայց եթե մի երկրում մարդասպանին, ով անցել է հղի կնոջ վրայով, տրորել և անգամ չի կանգնել բաց են թողնում, ինչ «խուլիգանի» ասես բաց են թողնում, ինչ-որ «կրիմինալի» նշանակում են քաղաքապետ, իսկ Ավետիք Չալաբյանի վրա գործ են «կարում», դա քաղաքական հետապնդում է: Ավետիք Չալաբյանը Հայաստանում քաղբանտարկյալ է»:
Հիշեցնենք, որ Մայիսի 14-ին Երևանի ընդհանուր իրավասության դատարանը բավարարեց հասարակական-քաղաքական գործիչ Ավետիք Չալաբյանի նկատմամբ որպես խափանման միջոց կալանավորումն ընտրելու նախաքննական մարմնի միջնորդությունը, և վերջինս կալանավորվեց երկու ամսով: Չալաբյանը կասկածվում է ընդդիմության հավաքներին և գործողություններին մասնակցելու համար Հայաստանի ազգային ագրարային համալսարանի ուսանողական խորհրդի նախագահին նյութապես շահագրգռելու մեջ:
Մարիամ Նալբանդյան
