Չարաշահել իշխանությունը՝ արդարացում ստանալու համար

2008 թվականի մարտի 1-ից շուրջ 14 տարի անց միայն, վճռաբեկ դատարանը բեկանել է վարչապետի պաշտոնը զբաղեցնող Նիկոլ Փաշինյանի, երկրապահ կամավորական միության ղեկավար Սասուն Միքայելյանի, Դանիայում Հայաստանի դեսպան Ալեքսանդր Արզումանյանի և նկարիչ, ակտիվիստ Տիգրան Բաղդասարյանի դատավճիռները։ Նրանք բոլորն էլ մարտի 1-ի ողբերգական իրադարձություններից հետո ձերբակալվել և տարբեր ժամկետներով ազատազրկման էին դատապարտվել։

2018 թվականի այսպես կոչված իշխանափոխությունից հետո, Նիկոլ Փաշինյանը հայտարարեց, որ իրենց համար մարտի 1-ի գործն այլևս բացահայտված է, այդ կապակցությամբ նույնիսկ 1,5 տարուց ավելի կալանքի տակ պահեցին նախկին նախագահ ՝ Ռոբերտ Քոչարյանին։ Մարտի 1-ի գործով անցնող բազմաթիվ ակտիվիստներ և անձինք իրենց գործերը բեկանելու դիմումներ էին ներկայացրել, սակայն 4 տարվա ընթացքում գործը, առավելապես Նիկոլ Փաշինյանի ջանքերի կամ ավելի շուտ անգործության հետևանքով, առաջ չէր գնացել։ Միայն երեկ վճռաբեկ դատարանը կարճատև նիստերի արդյունքում առանձին որոշումներ կայացրեց չորսին էլ անմեղ ճանաչելու և բոլոր դրվագներով արդարացնելու։ Առաջիկայում, ըստ տեղեկությունների, մինչև յոթ տասնյակ այսպիսի գործեր են սպասվում։ Ընդ որում այսօր քննված չորս բողոքներից միայն վարչապետի պաշտոնը զբաղեցնող Փաշինյանի գործն էր դատարան բերել գլխավոր դատախազը՝ հիմնվելով երկու ամիս առաջ եվրոպական դատարանի կայացրած վճիռի վրա, որով արձանագրվել էր, թե խախտվել են 2008-ին Լևոն Տեր –Պետրոսյանի աջակից, «Հայկական ժամանակ» օրաթերթի խմբագիր Փաշինյանի երկու հիմնարար՝ ազատության և անձնական անձեռնամխելիության, ինչպես նաև խաղաղ հավաքներ անցկացնելու իրավունքները։ Մյուս բոլոր դեպքերում փաստաբաններն են հետամուտ եղել, որպեսզի այդ գործերը հասնեն մինչև վճռաբեկ դատարան։

2008 թվականի իրադարձություններին Նիկոլ Փաշինյանը անմիջական և առանցքային մասնակցություն է ունեցել և տրամաբանական կլիներ, որ հենց ինքը կամ իր իշխանությանը ենթարկվող դատախազությունը վճռաբեկ բողոքներ ներկայացներ բոլոր դեպքերով, սակայն պարզվում է, որ Փաշինյանը պաշտոնեական դիրքի չարաշահում է անում՝ դատախազության ռեսուրսները ծառայեցնելով միայն իր համար։ Մյուս բոլոր դեպքերում որևէ անձի համար շահագրգռված չէ։ Եվշ եթե չլիներ առանձին փաստաբանների շահգրգռվածությունը, այդպես էլ նախկին քաղբանտարյալներից շատերը չեն արդարացվի։

Ըստ էության գործ ունենք մի իրավիճակի հետ, որ Փաշինյանը իշխանությունը օգտագործել է միայն անձնական կարիքների համար։ Իհարկե, իշխանափոխությունից հետո, Նիկոլ Փաշինյանն արդեն, լավագույն դեպքում, դատարանի առջև կկանգնի բոլորովին այլ մեղադրանքներով։ Իսկ մինչ այդ, շարունակում է անձնական նպատակներով օգտագործել վարչապետի պաշտոնը։

Հայկ Ճաղարյան