Ադրբեջանը լայնածավալ պատերազմի է պատրաստվում

Երեկ Ադրբեջանի զինված ստորաբաժանումները «Բայրաքթար» անօդաչու թռչող սարքեր են կիրառել, հարձակվել են Ասկերանի շրջանի Փառուխ գյուղի ուղղությամբ, հայկական կողմից 14 հոգի տարբեր աստիճանի վնասվածքներ են ստացել, նրանցից 2-ի վիճակը ծանր է։ Արցախի Զինված ուժերի 3 պայմանագրայիններ՝ Դավիթ Ռոբերտի Միրզոյանը, Իշխան Սերժիկի Օհանյանը և Արարատ Վագիֆի Թևոսյանը մահացել են։ Բոլոր դեպքերում հստակ է, որ թե՛ զոհվածները և թե՛ վիրավորները վնասվածքները ստացել են բայրաքթարների հարձակումների հետևանքով։

Ըստ էության, կարելի է փաստել, որ Ասկերանի շրջանի Փառուխ գյուղը ու մերձակա Քարագլուխ բարձունքը այլևս Հայաստանի վերահսկողության տակ չեն գտնվում։ Բոլոր մասնագետները, ռազմական փորձագետները, այդ թվում նույնիսկ փաշինյանական իշխանության մերձավոր դարձած Սամվել Բաբայանը՝ Արցախի Պաշտպանության բանակի նախկին հրամանատարը, ընդգծում են, որ Քարագլուխի բարձունքի գրավումը հակառակորդի կողմից վտանգ է ներկայացնում ամբողջ Ասկերանի շրջանին, և դրանով թշնամին կարողանում է արդեն կախվել Ստեփանակերտի վրա։

Ադրբեջանը շարունակում է նպատակամղված և հետևողականորեն վտանգել Արցախի բնակչության գոյությունը և Արցախի բնակչությունը այսպես երկար չի կարողանա տանել։ Թե՛ Հայաստանի, թե՛ Արցախի մարդու իրավունքների պաշտպանը դիմել են միջազգային հանրությանը, սակայն Արևմուտքից ընդամենը հատուկենտ կարեկցանքի խոսքեր են լսվել։

Փաստացի, Արցախի բնակիչները մենակ են մնացել հակառակորդի դեմ-դիմաց, իսկ ո՛չ Հայաստանի իշխանությունները, ո՛չ որևէ մեկը քայլեր չեն ձեռնարկում իրենց անվտանգությունն ապահովելու համար։ Այս ֆոնին ավելի ակտիվ է դարձել Արցախը հայաթափելու խոսակցությունները։ Նույնիսկ Հայաստանից են խոսակցություններ հնչում, թե հարկավոր է օր առաջ դատարկել Արցախը, որպեսզի մարդկանց կյանքը վտանգի չենթարկել։ Ընդհակառակը, հարկավոր է ամեն գնով մեկտեղել բոլոր ուժերը, համախմբվել, միջոցներ ձեռնարկել Արցախում բնակչության անվտանգությունն ապահովելու, Արցախը հայկական պահելու և պաշտպանելու թե՛ Հայաստանի թիկունքը, և թե՛ ժողովրդի գոյությունը այս տարածաշրջանում։

Արմեն Կարապետյան