Իշխանության հերթական ապօրինությունը բացահայտվեց ԱԺ-ում

Ընդդիմությունը շարունակում է գործող իշխանությունների նորանոր ապօրինություններ բացահայտել։ Ազգային ժողովում երեկ կայացել է «Հայաստան» համահայկական հիմնադրամից պետբյուջե փոխանցված գումարների օգտագործումն ուսումնասիրող ԱԺ քննիչ հանձնաժողովի նիստը։ «Հայաստան» խմբակցության պատգամավոր Թադևոս Ավետիսյանը պարզել է, որ ըստ ֆինանսների նախարարության տրամադրած տեղեկանքի՝ 2021 թվականին աշխատանքի և սոցիալական նախարարությանը հատկացվել է 7 միլիարդ 607 միլիոն դրամ՝ Արցախին ապրիլ ամսվա կենսաթոշակների վճարման համար, մինչդեռ կառավարության որոշման մեջ գրված է, որ հատկացվել է 7 միլիարդ 548 միլիոն դրամ։

Պատգամավորը տարակուսում է, փաստաթղթերում գրված գումարների միջև բացասական տարբերությունը կազմում է 60 միլիոն դրամ։ Ստացվում է, որ ֆինանսների նախարարությունը հայտնել է, որ այդ գումարը ծախսվել է, իսկ կառավարության ներկայացրած հիմքից, պարզ է, որ այդքան չի հատկացվել։ Դեռևս անցած տարի աշխատանքի և սոցիալական հարցերի նախարար աշխատած Մեսրոպ Առաքելյանը քննիչ հանձնաժողովին հայտնել էր, որ ֆիննախի կողմից որպես «Հայաստան» հիմնադրամից ծախսված միջոցներ ներկայացված գումարները իրականում եղել են նախարարության աշխատանքի պարգևատրումից հրաժարման արդյունքում խնայված միջոցները։ Մի կողմ թողնենք, որ այդ քանակության գումարներ հատկացնելու, կամ պարգևավճարներից հրաժարվելու դեպքում, ամենը փաստաթղթավորված պետք է լիներ և մանրամասն ներկայացվեր թղթերով, որպեսզի հետո խնդիր չառաջանար, հատկապես, որ իշխանությունը հրաշալի գիտեր, որ հիմնադրամից գումարների ծախսման հարցը քննելու համար հատուկ հանձնաժողով է ստեղծվել։

Իշխանությունները մինչև այս չեն կարողանում բացատրել 60 միլիոն դրամի տարբերությունը։ Իսկ գումարը, նշենք, բնավ էլ փոքր չէ, ամերիկյան դոլարով՝ 120 հազար դոլարից փոքր-ինչ ավելի։ Վստահ ենք, որ մանրամասն ուսումնասիրությունների դեպքում բացահայտվելու է գործող իշխանությունների կատարած տարբեր անփութություններ, անգործության հետևանքով առաջացած էական վնասներ, կամ էլ միտումնավոր կատարված հանցագործություններ։ Գործող իշխանությունները, որոնք հայտարարում են, թե Հայաստանում համակարգային կոռուպցիա չկա, այսօր իրականում զբաղված են պետական բյուջեն տարբեր թղթերով լափելու գործով։ Եվ, ըստ էության, մեր նշածը ընդամենը մեկ դրվագ էր այդ ամբողջ օվկիանոսում, որը իրականացվում է գործող իշխանությունների կողմից։ 

Խաչատուր Մանուկյան