Արևմուտքը ձգում է սանձերը. ի՞նչ է սպասվում Հայաստանին
ՎԵՐԼՈՒԾՈՒԹՅՈՒՆՆԵՐ
Ռուս-ուկրաինական պատերազմում Ռուսաստանի դեմ ներդրված պատժամիջոցները մինչ օրս միայն անուղղակի ազդեցություն են ունեցել Հայաստանի վրա։ Այդուհանդերձ, վստահաբար կարելի է ասել, որ ժամանակի ընթացքում այդ պատժամիջոցները անմիջական ազդեցություն պետք է ունենան նաև Հայաստանի դեմ։ Վերջին շրջանում Արևմուտքը պատժամիջոցների փաթեթ է ներդնում ոչ միայն Ռուսաստանի, այլև նրա մերձավոր և հնարավոր դաշնակիցների դեմ։ Իսկ ցանկացած այլ երկիր, որը փորձում է շրջանցել, կամ սեփական խաղը խաղալ այս իրավիճակում, բախվելու է լրջագույն խնդիրների։ Փաստացի, սա վերաբերում է նաև Հայաստանին, որը թեև ռուս-ուկրաինական պատերազմի առաջին օրվանից սկսած փորձել է չեզոք դիրք գրավել և ապահովել իր, իբր, անկողմնակալ դիրքորոշումը, այս քաղաքականությունը առանձնակի լուրջ հաջողություններ չի ունեցել։
Արևմուտքը Ռուսաստանին հնարավոր տնտեսական բոլոր միջոցներով նեղը գցելու իր մոլուցքի մեջ, չի կանգնելու ոչնչի առջև։ Եվ Հայաստանը ստիպված է լինելու ընտրություն կատարել, Արևմուտքի կամ Ռուսաստանի միջև։ Երկընտրանքը մեղմ ասած այնքան էլ հուսադրող չէ։ Հայաստանը իր տնտեսական բոլոր հնարավորություններով գտնվում է Ռուսաստանի հետաքրքրությունների տիրույթում, անվտանգության համակարգով՝ հավաքական անվտանգության պայմանագրի կազմակերպության երկրների շարքում, իսկ Ռուսաստանը Հայաստանի հիմնական առևտրատնտեսական գործընկերն է։
Եվ ստեղծված իրավիճակում արձանագրելու ենք, որ առաջիկայում պատժամիջոցների տակ կարող է հայտնվել նաև Հայաստանը։ Իհարկե, թե՛ Միացյալ նահանգների, թե՛ Ֆրանսիայի, թե՛ այլ երկրների դեսպանատներն ու համապատասխան կառույցները առայժմ հանդուրժում են Հայաստանի կրավորական դիրքը։ Սակայն գալու է ինչ-որ պահ, որ մեզ ևս դնելու են կարճ և հստակ երկընտրանքի առջև. արդյո՞ք մենք Արևմուտքի, թե՞ Ռուսաստանի հետ ենք։ Եվ Հայաստանի իշխանությունները ստիպված են կատարել այդ երկընտրանքը՝ ընտրել կողմերից որևէ մեկին, ինչը նշենք բոլոր առումներով թե՛ Արևմուտքին, թե՛ Ռուսաստանին ընտրելու դեպքում որևէ լուրջ հեռանկար չի խոստանում Հայաստանին։ Երկու դեպքում էլ մենք հայտնվելու ենք աքցանի մեջ, երկու դեպքում էլ մենք տնտեսական, քաղաքական և ռազմական լուրջ խնդիրներ ենք ունենալու։
Սամվել Մանուկյան
