Լուրջ փորձություն Սահմանադրական դատարանի համար

Վաղը Հայաստանի Սահմանադրական դատարանը քննելու է ծանր վիրավորանքի քրեականացման սահմանադրականության հարցը։ Հայցը Հայաստանի Սահմանադրական դատարան ներկայացրել էր նախկին օմբուդսմեն Արման Թաթոյանը՝ փաստարկելով, որ քրեական օրենսգրքի այդ փոփոխությունը, որը թույլ էր տալիս իշխանությանը հետապնդումներ իրականացնել իր ընդդիմախոսների դեմ, հակասահմանադրական է և լուրջ խնդիրներ է հարուցում Հայաստանի Հանրապետության համար։ Հայաստանի իշխանությունների կողմից ժամանակին այդ հայցի դեմ իր փաստարկները ներկայացրել էր արդարադատության փոխնախարար՝ Քրիստինե Գրիգորյանը, իսկ այժմ ճակատագրի հեգնանքն այն է, որ նույն Քրիստինե Գրիգորյանը Սահմանադրական դատարանում ստիպված է լինելու պաշտպանել ոչ թե իր՝ փաստարկները, այլ Արման Թաթոյանի ներկայացրած հայցը։ Նորանշանակ Մարդու իրավունքների պաշտպանը փորձում է համոզել, որ ոչ թե ինքը, այլ կառավարությունն է դրական եզրակացություն տվել նախագծին, իսկ ինքը ընդամենը ներկայացրել է այդ եզրակացությունը։ Նա հայտարարել է, որ իր նախորդի՝ Արման Թաթոյանի կողմից բարձր դատարան ներկայացրած որևէ դիմում մտադիր չէ հետ վերցնել, բայց ասում է, որ ունեն խնդիրներ պրակտիկայի հետ կապված։

Նախկին օմբուդսմենը, որը Հայաստանի Հանրապետության ամենաարդյունավետ պաշտոնյաներից մեկն էր, այժմ էլ շարունակում է իր իրավապաշտպան գործունեությունը՝ չափազանց բարձր վարկանիշ ունենալով։ Նորանշանակ Մարդու իրավունքների պաշտպանը հայտնվել է երկու կրակի արանքում։ Լինելով փաշինյանական վարչախմբի կարկառուն ներկայացուցիչներից մեկը՝ նա այժմ ստիպված է պաշտպանել նախորդի նախաձեռնությունները։ Կա՛մ նա վերածվելու է իսկապես արդյունավետ Մարդու իրավունքների պաշտպանի և պաշտպանելու է հանրության շահերը, կա՛մ էլ վերջնականապես խայտառակ է լինելու և չի կարողանալու ոչինչ անել։

Ըստ էության, ծանր վիրավորանքի քրեականացումը լուրջ գործիք դարձավ փաշինյանական իշխանությունների ձեռքին, հայհոյանքների, Փաշինյանի նկատմամբ վիրավորական արտահայտությունների, կամ նույնիսկ նախկին նախագահների կողմից տված քաղաքական գնահատականների համար տարբեր մարդկանց դեմ քրեական գործեր հարուցելու։ Իրավապաշտպաններն ու իրավաբանները դեռ նախքան օրենքի ընդունումը նշում էին, որ լուրջ խնդիրներ է հարուցելու այս օրենքի ընդունումը։ Ծանր վիրավորանքը ապաքրեականացնելու կոչով Հայաստանին են դիմել միջազգային մի շարք կառույցներ, այդ թվում ԵԽԽՎ-ն, «Ֆրիդոմ հաուս» կազմակերպությունը։ Այս օրենքը լուրջ հետընթաց են համարել բոլոր միջազգային կառույցները։ Փաշինյանական վարչակազմը, սակայն մտադիր չէ ընկրկել և մինչև վերջ ցանկանում է պատժել բոլոր իր ընդդիմախոսներին։

Արմեն Մանասյան