Հայաստանի իրավական համակարգում քաոսը շարունակվում է
ՎԵՐԼՈՒԾՈՒԹՅՈՒՆՆԵՐ
Հայաստանի իրավական համակարգում քաոսը շարունակվում է, և շարունակվում է բացառապես մեկ մարդու՝ Հայաստանի վարչապետի աթոռը զբաղեցնող Նիկոլ Փաշինյանի մեղքով։ Գլխավոր դատախազի խորհրդական Գոռ Առաքելյանը երեկ գրել էր, թե դատական դեպարտամենտին են վերադարձրել քրեական գործով առգրավված համակարգի գործարկման և շահագործման բանալիները։
Հիշեցնենք, որ ամիսներ առաջ Նիկոլ Փաշինյանի անմիջական հրահանգով առգրավեցին դատական դեպարտամենտի համապատասխան համակարգիչները, որոնց միջոցով տարբեր գործեր մակագրվում էին դատավորներին։ Համակարգն աշխատում էր բավական արդյունավետ և գործերը մակագրում էր ոչ թե իշխանությունների ցանկությամբ և հանձնարարություններով, այլ ավտոմատ կերպով: Արդյունքում ստացվում էր այնպես, որ անկախ դատավորները հնարավորություն էին ունենում իրական արդարադատություն իրականացնելու և Նիկոլ Փաշինյանի վարչակազմի կողմից կալանքի դատապարտված մարդկանց արդարացնելու և ազատ արձակելու:
Բարձրագույն դատական խորհուրդը երեկ արձագանքել է դատախազության ներկայացուցչի հայտարարությանը, որում նշել է, թե համակարգի գործարկման և շահագործման առգրավված բանալիները դատական դեպարտամենտ չեն վերադարձվել։ Ըստ էության, սա նշանակում է նոր լարվածության առաջացում, այս անգամ էլ մի կողմից Բարձրագույն դատական խորհրդի, դատական դեպարտամենտի, և մյուս կողմից գլխավոր դատախազության ու փաշինյանական իշխանության միջև։
Բարձրագույն դատական խորհուրդն արդեն հասցրել էր խնդիրներ ունենալ արդարադատության գործող նախարար Կարեն Անդրեասյանի հետ՝ մերժելով նրա ներկայացրած երկու տասնյակ միջնորդություններից 15-ը, որոնք վերաբերում էին դատավորների կարգապահական վարույթներին։ Այժմ էլ գլխավոր դատախազությունն է ստում ՝ փորձելով տպավորություն ստեղծել, թե իրենք պահպանում են օրենքի տառն ու ոգին։ Մինչդեռ իրականում ակնհայտ է, որ որևէ նման գործողություն չի իրականացվել, այլապես Բարձրագույն դատական խորհուրդը պաշտոնական հայտարարություն չէր անի: Փաշինյանական իշխանությունը այդպես էլ չի կողմնորոշվում, թե ինչպես վարվի արդարադատության համակարգի հետ։ Սահմանադրական դատարանից բռնած մինչև վերջին մարմինը, փորձառու իրավաբաններն ու մարդկային հետագիծ ունեցող մարդիկ պայքարում են իրենց անկախության համար, և գործող իշխանությունները հայտնվել են ցայտնոտային իրավիճակում, չեն հասկանում, թե ինչպես պիտի շարունակեն իրենց պաշտոնավարումը և իշխանության կարևորագույն ճյուղերից մեկը այդպես էլ չի ընկրկում և չի կռանում Նիկոլ Փաշինյանի իշխանության տակ։
Հովհաննես Ավետիսյան
