Պատրաստ ենք Թուրքիայում կազմակերպել Ռուսաստանի եւ Ուկրաինայի նախագահների հանդիպումը. Չավուշօղլու
ՔԱՂԱՔԱԿԱՆՈՒԹՅՈՒՆ
«Ուրախ կլինենք ընդունել Ռուսաստանի Դաշնության եւ Ուկրաինայի նախագահներին»,- ասել է նա՝ հավելելով, որ Անկարան մտադիր է շարունակել գործադրել բոլոր ջանքերը՝ Ուկրաինայում տիրող իրավիճակը կարգավորելու համար։
Լավրովի խոսքով՝ ռուս-թուրքական բանակցություններում Պուտինի եւ Զելենսկու հնարավոր հանդիպումը չի քննարկվել։
«Այսօր մենք դա հատուկ չենք քննարկել, քանի որ նախագահ Պուտինը եւ մեր մյուս ներկայացուցիչները բազմիցս անդրադարձել են այս թեմային իրենց մեկնաբանություններում՝ պատասխանելով համապատասխան հարցերին»,- ասել է նա։ «Հանդիպում կազմակերպելու համար ոչ մի խոչընդոտ չկա»,- հավելել է Չավուշօղլուն։
Լավրովն ընդգծել է, որ Ռուսաստանը պատրաստ է ուկրաինական կողմի հետ բանակցել միայն այն հանդիպումների շուրջ, որոնք կոնկրետ արդյունքների կհանգեցնեն։ Նրա խոսքով՝ Ուկրաինայի ղեկավարությունը ցանկանում է հանդիպել միայն հեռուստատեսային պատկերի համար, իսկ իրական պայմանավորվածությունների հասնելու դեպքում Կիեւը դրանք սաբոտաժի է ենթարկում, ինչպես դա եղավ Մինսկի պայմանավորվածությունների դեպքում։ «Ուստի մենք շատ լուրջ դաս ենք քաղել ուկրաինացի ղեկավարների այս բարքերից։ Այժմ մենք կպայմանավորվենք հանդիպումների մասին, որոնք իսկապես արդյունքի կհանգեցնեն»,- հավելել է ՌԴ արտգործնախարարը։
Նա նշել է, որ ռուսական կողմը պատրաստ է շարունակել շփումները Ուկրաինայի հետ՝ Թուրքիայի մասնակցությամբ։
