Հայաստանը՝ տարանցիկ կետ Ռուսաստանից փախչելու համար․ տնտեսական հնարավորությունները մեծ չեն

Ռուս-ուկրաինական պատերազմի պայմաններում, աննախադեպ աճով աճել է Ռուսաստանից դեպի Երևան ռուսաստանցիների գալուստը, այլ բառով ասած՝ փախուստը։ Մեծ քանակությամբ ռուսների այս օրերին կարող ենք տեսնել Երևանի փողոցներում, սրճարաններում և հյուրանոցներում։ Վախենալով արևմտյան պատժամիջոցներից, կամ գործազրկությունից և այլ խնդիրներից՝ ինչպես նաև Ռուսաստանում հնարավոր հայտարարվելիք զորահավաքից, Ռուսաստանի շատ քաղաքացիներ լքում են իրենց երկիրը և տեղափոխվում են այլ երկրներ։ Կարելի էր մտածել, թե Երևանը նրանց ուղևորության վերջնակետը կարող էր դառնալ, սակայն իրականում դա այդքան էլ այդպես չէ։

Ընդամենը օդային տարածքի փակ լինելու պատճառով և ռուսական օդանավերի վրա դրված պատժամիջոցների հետևանքով է, որ Երևանը հարմար տարանցիկ կետ է դարձել, որտեղից ռուսները կարող են հեռանալ այլ երկրներ։ Այս օրերին դա կարճաժամկետ տնտեսական էֆեկտ կարող է տալ Հայաստանի համար՝ ավելացնելով թե՛ սննդամթերքի, թե՛ հյուրանոցային ծառայություններից օգտվողների թիվը։

Հաշվի առնելով, որ Հայաստանում արագորեն բարձրանում է ԱՄՆ դոլարի փոխարժեքը, վերջին 7 օրվա ընթացքում դոլարը 476 դրամից արդեն հասել է 503-504 դրամի միջակայք, կարելի է նշել, որ Հայաստանին տնտեսական լուրջ խնդիրներ են սպասվում և հիացական այն բացականչությունները՝ Ռուսաստանի քաղաքացիների Հայաստան տեղափոխվելու, կամ Հայաստանում ընդմիշտ հիմնավորվելու վերաբերյալ, բացարձակապես անհիմն են։

Գումար ունեցողները կնախընտրեն հեռանալ Հայաստանից, նույնիսկ մեծ թվով հայեր, որոնք ստիպված են Ռուսաստանից վերադառնալ Հայաստան, պատշաճ պայմաններ չապահովելու դեպքում կհեռանան այլ երկրներ։ Հայաստանը նաև հնարավորություն է ռուսների համար տեղում փոխելու ռուսական ռուբլին, ԱՄՆ դոլար կամ եվրո գնելու, ինչպես նաև տոմս ձեռք բերելու այլ երկրներ տեղափոխվելու համար։ Ի դեպ Մոսկվայից Երևան չվերթների տոմսերի գինն արդեն անցել է 1000 և ավելի դոլարը և օրական 25-ից 30 չվերթ է ժամանում Երևան։

Մեր աղբյուրներով, մեծ քանակությամբ ռուսներ Հայաստան գալիս են նաև ցամաքային ճանապարհով՝ իրենց մեքենաներով։ Ըստ էության, Հայաստանի իշխանությունը կարիք ունի լուրջ ենթակառուցվածքներ և քայլեր ձեռնարկել հնարավորինս շատ ռուսական ընկերություններ Հայաստան բերելու, Հայաստանում տեղավորելու, նրանց նաև հնարավորություն տալու տեղում գործունեություն ծավալելու, եթե իհարկե ինքն էլ չհայտնվի արևմտյան պատժամիջոցների ներքո։

Հակոբ Իսկանդարյան