Դատական ապտակ Փաշինյանին՝ գրիչի գործով

Երևանի ընդհանուր իրավասության դատարանը՝ դատավոր Գայանե Խաչատրյանի գլխավորությամբ, երեկ արտառոց մի վճիռ է կայացրել, որոշել է, որ Նիկոլ Փաշինյանը զրպարտել է Սահմանադրական դատարանի նախկին նախագահ ներկայումս ՍԴ դատավոր Հրայր Թովմասյանին։ Այս պատմությունը սկսվել էր 2020 թ.-ին, երբ Թովմասյանը գլխավորում էր Սահմանադրական դատարանը, իսկ Փաշինյանը և իր կողմնակիցները մեթոդներ էին մշակում ՍԴ-ից Հրայր Թովմասյանին և մի քանի այլ անձանց դուրս մղելու ուղղությամբ։ Իր ասուլիսներից մեկում Նիկոլ Փաշինյանը հայտարարել էր, թե 2018 թ. մայիսից սկսած, սկզբից ամենօրյա ռեժիմով, հետո ամենշաբաթյա, ապա՝ ամենամսյա ռեժիմով Հրայր Թովմասյանը իր ծառայություններն է առաջարկել իրեն։

Հրայր Թովմասյանը 20 օր ժամկետ էր տվել Նիկոլ Փաշինյանին, իր հայտարարությունները հերքելու համար, այլապես սպառնացել էր դիմել դատարան։ Հաջորդ օրն իսկ Նիկոլ Փաշինյանը մարզից վերադարձել էր Երևան, մի գրիչի լուսանկար հրապարակել, որը միջոցառումներից մեկի ժամանակ իրեն էր նվիրել Հրայր Թովմասյանը։ Անհեթեթ այդ փաստարկը ծաղրի էր արժանացել նույնիսկ Նիկոլ Փաշինյանի բազմաթիվ կողմնակիցների կողմից, որոնք գիտակցում էին, որ Փաշինյանի հայտարարությունը բացարձակ հիմնազուրկ է և անհեթեթ։

Ընդսմին 2 տարի անց դատարանը արտառոց և իրավունքի տեսակետից արդարացված վճիռ է կայացրել՝ Նիկոլ Փաշինյանին պարտավորեցնելով հրապարակայնորեն հերքել իր իսկ զրպարտչական արտահայտությունը։ Նիկոլ Փաշինյանի փաստաբան Գևորգ Գյոզալյանը հայտարարել է, թե վարչապետն այս որոշմանը դեմ է և անպայման վերաքննիչ բողոք է ներկայացնելու։ Հաշվի առնելով արդարադատության համակարգի ներկայումս ստեղծված ամենաթողության մթնոլորտը՝ չի բացառվում, որ վերաքննիչ դատարանը վճիռ կայացնի հօգուտ Նիկոլ Փաշինյանի։ Ամեն դեպքում նույնիսկ առաջին ատյանի այս վճիռը լրջագույն ապտակ է Նիկոլ Փաշինյանին և նրա քաղաքական թիմին, և ապացուցում է, որ Նիկոլ Փաշինյանը զերծ չի մնում տարբեր անձանց հասցեին զրպարտություններ անելու գայթակղությունից։

Արտաշես Երեմյան