Ուկրաինական պատվիրակության անդամն ասում է, որ բանակցությունները տեղի չեն ունենա Բելառուսում նախատեսված վայրում, չնայած ՌԴ պատվիրակությունն արդեն այնտեղ է
ՄԻՋԱԶԳԱՅԻՆ
Ռուս-ուկրաինական պատերազմի հանգուցալուծման համար կողմերի բանակցությունները տեղի չեն ունենա Բելառուսի Բելովեժսկայա պուշչայում, բանակցությունների համար այլ վայր է նախատեսված:
Այս մասին հայտնում է ՏԱՍՍ-ը, հղում անելով Ուկրաինայի պատվիրակության անդամ Դավիդ Արախամիային.« Բանակցությունները տեղի կուեննան, բայց ոչ Բելառուսի Բելովեժսկայա պուշչայում: Մանրամասները ավելի ուշ»,-գրել է նա:
Սակայն, ռուսական պատվիրակությունն արդեն ժամանել է Բելովեժսկայա պուշչա, որտեղ, ինչպես նախապես պլանավորվել էր, տեղի պետք է ունենա երկու երկրի բանակցությունների երկրորդ փուլը։
Ժամանելուց հետո ՌԴ պատվիրակության ղեկավար Վլադիմիր Մեդինսկին հայտնել է, որ Ռուսաստանի Դաշնության ներկայացուցիչները սպասում են ուկրաինական պատվիրակությանը մարտի 3-ին։ Նրա խոսքով՝ Ռուսաստանն ու Ուկրաինան համատեղ են ընտրել բանակցությունների վայրը։ Բելառուսի արտաքին գործերի նախարարությունն էլ հայտարարել է, որ Բելովեժսկայա Պուշչայում բանակցությունների երկրորդ փուլի մասնակիցները կհյուրընկալվեն Որսորդի տանը։
Ի պատասխան այս հայտարարությունների՝ Կիևի պատվիրակության անդամներից մեկը՝ Ուկրաինայի նախագահի աշխատակազմի ղեկավարի խորհրդական Միխայիլ Պոդոլյակը կոչ է արել սպասել «երկխոսության իրական մեկնարկին»։ «Կասկածելի է, որ առանց սեղանի շուրջ երկրորդ [ուկրաինական] կողմի ներկայության, կարող են իրական բանակցություններ վարվել», - գրել է նա Twitter-ում: «Ուստի սպասեք երկխոսության իրական մեկնարկին»:
