Ամերիկյան սիրաշահումներ Հայաստանին
ՎԵՐԼՈՒԾՈՒԹՅՈՒՆՆԵՐ
Հայաստանում Միացյալ Նահանգների դեսպանատունն անդրադարձել է Սումգայիթում հայերի ջարդերին։
«Այսօր մենք միանում ենք հայերին` սգալով և տուրք մատուցելով 1988թ․ Սումգայիթում զոհ գնացածների հիշատակին», - ասված է դեսպանության ֆեյսբուքյան էջի գրառման մեջ։
Սումգայիթում իրագործված հայերի ջարդերի 34-րդ տարելիցի կապակցությամբ հայտարարության մեջ Հայաստանի արտգործնախարարությունը շեշտել է, որ հայատյացությունը և ուժի կիրառման սպառնալիքը շարունակում է մնալ Ադրբեջանի պետական քաղաքականությունը, «ինչն ակնհայտորեն հակասում է խաղաղ, զարգացող և կայուն տարածաշրջան ունենալուն ուղղված տարածաշրջանային և միջազգային ջանքերին»:
Հատկապես ռուս-ուկրաինական պատերազմի պայմաններում Միացյալ Նահանգների դեսպանատան այսպիսի գնահատականը և Սումգայիթում հայերի ջարդերի թեմային անդրադառնալը բացառապես քաղաքական քայլ է և սիրաշահելու դրսևորում Հայաստանի Հանրապետության նկատմամբ։ Գաղտնիք չէ, որ Միացյալ Նահանգներն ու արևմուտքն այս օրերին ակտիվորեն պաշտպանում են Ուկրաինային Ռուսաստանի դեմ պատերազմում և խնդիր են դրել իրենց առջև նաև Ռուսաստանից հեռացնել նրա գործընկերներին, իհարկե, եթե իրավիճակը սրված չլիներ միջազգային հարաբերություններում, Միացյալ Նահանգների դեսպանատունն առանձնապես շահագրգռված չէր լինի՝ անդրադառնալով ո՛չ Սումգայիթին, ո՛չ էլ որևէ այլ՝ Հայաստանի համար էական նշանակություն ունեցող խնդրի։
Ըստ էության, Միացյալ Նահանգները սիրաշահում է Հայաստանին, իսկ Հայաստանում գտնվող արևմտամետ ուժերը ԱՄՆ դեսպանատան ցանկացած հայտարարություն ուռճացնելու, տարածելու և փորձելու են ներկայացնել որպես արևմուտքի առանձնաշնորհյալ վերաբերմունք Հայաստանի Հանրապետության նկատմամբ։ Որ քաղաքական լուրջ հետևանքներ և հեռուն գնացող եզրակացություններ անել այսպիսի հայտարարություններից բնավ պետք չէ։ Ընդհակառակը պետք է գիտակցել, որ սա ժամանակավոր սիրաշահում է, ժամանակավոր սիրախաղ, որը կապված է ոչ թե Հայաստանի անցյալի, հայոց պատմության ցավալի դրվագների, այլ ընդամենը ռուս-ուկրաինական պատերազմում Հայաստանին հակառուսական ճամբար մղելու անթաքույց ցանկությունը։ Հայաստանի Հանրապետությունն, իհարկե, կարող է ընդամենը շնորհակալություն հայտնել, կամ նույնիսկ չհայտնել ԱՄՆ դեսպանատան այս հայտարարության վերաբերյալ։
Արման Հայրապետյան
