Լարվածությունը ռազմական դաշտից պետք է դուրս գա
ՔԱՂԱՔԱԿԱՆՈՒԹՅՈՒՆ
Ուկրաինայի դեմ ռազմական գործողությունների պատճառով մի շարք պատժամիջոցներ են կիրառվել Ռուսաստանի դեմ։
Այս մասիմ զրուցել ենք տնտեսագետ Թաթուլ Մանասերյանի հետ։
Հարցին, թե Ռուսաստանի նկատմամբ սահմանված պատժամիջոցներն ի՞նչ ազդեցություն կունենան Հայաստանի տնտեսության վրա` տնտեսագետն ասաց. «Այդ հարցը պետք է դիտարկել երկու տեսանկյունից։ Եթե պատժամիջոցները երկար ժամանակ տևեն, ապա Հայաստանի տնտեսության վրա բացասական ազդեցությունն ակնհայտ է լինելու։ Եթե կարճաժամկետ լինեն, կողմերի միջև հանգուցալուծում լինի, ապա ոչ միայն Հայաստանի, այլ նաև Ռուսաստանի տնտեսությունը շատ չի տուժի։ Բայց ես կարծում եմ, որ պատժամիջոցները կարող են մի քիչ երկարել։ Իհարկե, պետք է հաշվի առնել հետևյալը, որ տվյալ պարագայում դրանք միակողմանի չեն կարող լինել։ Փորձը ցույց է տվել, որ փոխկապակցված աշխարհում անպայման նաև բումերանգի էֆեկտն է աշխատում։ Քանի որ նաև Արևմուտքը բազմաթիվ թելերով ներկա է ռուսական շուկայում, ուստի, և բանկային համակարգին ուղղված պատժամիջոցները, և տարբեր այլ խնդիրներ ունեն կողմնակի էֆեկտներ։Ամեն դեպքում, ես կարծում եմ, որ լարվածությունը ռազմական դաշտից պետք է դուրս գա, քաղաքական դիվանգիտությունից բացի նաև տնտեսական դիվանագիտությունն է այստեղ կարևոր դեր խաղալու։ Չմոռանանք, որ Ռուսաստանի գազային դիվանագիտությունը բավական հղկված ու արդյունավետ է, եթե Ռուսաստանի ազգային շահերի տեսանկյունից նայենք, և, հետևաբար, կոնկրետ այս դեպքում Արևմուտքի կախվածությունը Ռուսաստանից նույնպես ակնհայտ է։ Այսինքն՝ որևէ երկիր որևէ մեկի հանդեպ քայլեր կիրառելիս, անկախ նրանից, հիմնավոր են այդ քայլերը, թե ոչ, պետք է հաշվի առնի, որ տնտեսությունները փոխկապակցված են։ Եվ այստեղ դժվար է ասել՝ որևէ երկիր ավելի շատ կտուժի, մյուսներն՝ ավելի պակաս»։
Սոնա Գիշյան
