Ադրբեջանն անցնում է հոգեբանական ճնշման նոր մեթոդի

Ադրբեջանը նոր մեթոդներ է սկսել կիրառել արցախցիներին ճնշելու, իրենց բնօրրանից դուրս մղելու հարցում։ Երեկ երեկոյան՝ ժամը 6-ի սահմաններում, ադրբեջանական զինված ուժերի ներկայացուցիչներն Արցախի Հանրապետության Ասկերանի շրջանի Խրամորթ գյուղի վարչական սահմանների մոտ բարձրախոսով ձայնագրություն են միացրել, որում հայտարարվել է, թե բնակիչները պետք է լքեն բնակավայրը, այլևս վար ու ցանք չանեն Խրամորթում, որ այն իբրև թե ադրբեջանական տարածք է և այլն։ Ընդ որում, ձայնագրությունը եղել է հայերեն և բավական բարձր, ինչը նշանակում է, որ Ադրբեջանը հատուկ սարքավորումներ է տեղադրել սահմանին՝ հոգեբանական ճնշման ենթարկելու համար։

 

Արցախյան 44-օրյա պատերազմից հետո թշնամին արցախցիներին հայրենիքից դուրս մղելու ամենօրյա գործողություններ է իրականացնում՝ կրակոցներ, սպանություններ, առևանգումներ, գյուղատնտեսական տեխնիկայի վնասում, անասունների կողոպուտ։ Այժմ էլ անցել է բացահայտ հոգեբանական տեռորի։ Իհարկե, այսպիսի վարքը չի կարող անհետևանք մնալ, շատերը կնախընտրեն հեռանալ՝ իրենց ու իրենց երեխաների կյանքն ու անվտանգությունն ապահովելու համար։ Արցախում գտնվող ռուս սահմանապահները հազվադեպ են միջամտում, այն էլ, սովորաբար, առավել ծանր դեպքերում։

 

Հայաստանի գործող իշխանությունները 2020 թվականի նոյեմբերի 9-ից հետո լիովին մենակ են թողել արցախցիներին ադրբեջանցիների դեմ, իսկ հազվադեպ հնչող արձագանքներն էլ միայն ստիպողաբար են լինում, երբ արդեն բանը բանից անցած է լինում։ Վա՞խն է ադրբեջանցիներից, թե՞ այլ, ավելի դավաճանական պատճառ կա այս վարքագծում, բարդ է ասել։ Համենայն դեպս, ՀՀ գործող վարչախումբը լրիվ բացակա է Արցախից։ Միակ պաշտոնյան, ով չէր կաշկանդվում, բարձրաձայնում էր ադրբեջանցիների վայրագությունները, ՀՀ ՄԻՊ Արման Թաթոյանն էր, վերջինս էլ նախօրեին ավարտել է իր առաքելությունը։ Նորանշանակ ՄԻՊ Քրիստինե Գրիգորյանն էլ զբաղված է ՄԻՊ ֆեյսբուքյան էջի հարցերով, արցախցիների խնդիրներով զբաղվելու ժամանակ չունի։